Беларуская інфармацыйная кампанія
Адрас старонкі: http://by.belapan.by/archive/2017/08/10/915308_447856/
Дата раздрукоўкі: 17.10.2017 18:01
10.08.2017 15:47 Палітыка, Грамадства

Праваабаронцы: На палітвязня Міхаіла Жамчужнага ў калоніі аказваецца націск

Мінск, 10 жніўня. Палітвязень Міхаіл Жамчужны пасля пераводу ў ліпені ў папраўчую калонію № 9 горада Горкі (Магілёўская вобласць) ужо другі раз змешчаны ў штрафны ізалятар (ШІЗА), паведамляе праваабарончы сайт spring96.org.

Паводле звестак праваабаронцаў, 3 жніўня адміністрацыя калоніі спрабавала перавесці Жамчужнага ў атрад, сфармаваны з асуджаных з "нізкім статусам". Калі палітвязень адмовіўся, у дачыненні да яго склалі рапарт аб парушэнні ўмоў адбыцця пакарання, і Жамчужны быў адпраўлены на пяць сутак у ШІЗА.

Пасля выхаду з ізалятара, 8 жніўня, яго зноў паспрабавалі адвесці ў той жа атрад, аднак Жамчужны зноў адмовіўся і зноў быў адпраўлены ў ШІЗА — ужо на 10 сутак. З 9 жніўня ён знаходзіцца ў ізалятары, адміністрацыя калоніі расцэньвае адмовы зняволенага як непадпарадкаванне.

Праваабаронцы лічаць, што сваімі дзеяннямі адміністрацыя папраўчай установы аказвае націск і наўмысна арганізуе правакацыі супраць Жамчужнага.

Міхаіл Жамчужны — былы дацэнт Віцебскага дзяржаўнага тэхналагічнага ўніверсітэта, кандыдат тэхнічных навук, аўтар некалькіх навуковых манаграфій і распрацовак, вынаходнік. Першым у Беларусі зарэгістраваў самаробны аўтамабіль на альтэрнатыўным паліве.

Жамчужны перадаваў звесткі пра ўтрыманне зняволеных у месцах пазбаўлення волі праваабарончай арганізацыі "Платформа" (папярэдніца арганізацыі "Платформ інавейшн"). Быў затрыманы ў 2014 годзе. У ліпені 2015 года Віцебскі абласны суд прызнаў яго вінаватым у падбухторванні да наўмыснага раскрыцця звестак, якія з'яўляюцца службовай тайнай, незаконным набыцці і збыце спецыяльнага тэхнічнага сродку, прызначанага для таемнага атрымання інфармацыі, і даванні хабару. Праваабаронцу прыгаварылі да шасці гадоў пазбаўлення волі ў калоніі строгага рэжыму. Судовая калегія па крымінальных справах Вярхоўнага суда, разгледзеўшы ў кастрычніку таго ж года касацыйную скаргу на прысуд, прызначыла яму больш строгае пакаранне — шэсць з паловай гадоў пазбаўлення волі.

Беларускія праваабаронцы прызналі Жамчужнага палітвязнем.

Жамчужны ўтрымліваўся ў калоніі ў Навасадах (Барысаўскі раён Мінскай вобласці), затым у калоніі № 11 у Ваўкавыску (Гродзенская вобласць). 10 ліпеня палітвязень пераведзены ў Горкі.
Аляксей Аляксандраў, БелаПАН.

Аўтарызацыя

Імя:
Пароль:

Архіў

  • дзень
  • месяц
  • год

Сюжэты

Праекты


© 2000 — 2017 БелаПАН. Усе правы абароненыя.
Уся інфармацыя, размешчаная на гэтым сайце, прызначана толькі для персанальнага выкарыстання і не падлягае далейшаму ўзнаўленню і/або распаўсюджванню ў любой форме інакш як з пісьмовага дазволу БелаПАН