Беларуская інфармацыйная кампанія
Адрас старонкі: https://by.belapan.by/archive/2014/09/25/729080_729084/
Дата раздрукоўкі: 28.01.2020 17:53
25.09.2014 13:18 Грамадства, Палітыка

Леанід Козік падаў заяву аб звальненні з пасады старшыні ФПБ

Мінск, 25 верасня. Старшыня Федэрацыі прафсаюзаў Беларусі Леанід Козік падаў заяву аб звальненні, але фармальна пакуль застаецца кіраўніком ФПБ. Аб гэтым БелаПАН паведаміла прэс-сакратар федэрацыі Юлія Фядотава.

"Так, магу пацвердзіць, што Леанід Пятровіч 22 верасня звярнуўся ў Савет ФПБ з просьбай вызваліць яго ад пасады, — сказала яна. — Але на гэты момант ён з'яўляецца старшынёй, бо пасяджэння савета ФПБ яшчэ не было. А паўнамоцтвы, згодна са статутам, з яго можа зняць толькі савет".

Дата правядзення савета ФПБ пакуль невядомая, але Леанід Козік, паводле слоў Фядотавай, "настроены катэгарычна". "Гэтае рашэнне ў яго выспявала даўно. Яму ўжо 67-мы год, як ён сам неаднаразова адзначаў. Ён лічыць, што шмат зрабіў за гэтыя 12 гадоў і абірацца на з'ездзе на новы тэрмін ён не хацеў", — сказала прэс-сакратар.

Фядотава падкрэсліла: Леанід Козік вырашыў звольніцца цяпер, каб за астатні да наступнага з'езда ФПБ год (ён намечаны на верасень 2015 года) "людзі змаглі прыгледзецца да новых кандыдатаў".

"Што да домыслаў у інтэрнэце (называліся версіі, што Козіка фактычна прымусілі сысці. — БелаПАН.), то Леанід Пятровіч шкадуе, што не ўсе людзі могуць зразумець, што падобныя рашэнні чалавек можа прымаць самастойна", — дадала прэс-сакратар ФПБ.

Леанід Козік быў абраны старшынёй ФПБ летам 2002 года. Дагэтуль ён займаў шэраг кіруючых пасад у органах беларускай улады і Саюзнай дзяржавы Беларусі і Расіі, працаваў намеснікам кіраўніка Адміністрацыі прэзідэнта.

Да прыходу Козіка ФПБ нейкі час успрымалася ўладамі як апазіцыйная структура: старшыня Федэрацыі прафсаюзаў Уладзімір Ганчарык удзельнічаў у прэзідэнцкіх выбарах 2001 года як адзіны кандыдат ад апазіцыі. Козіка лічаць стаўленікам Лукашэнкі, якому неабходна было бачыць на чале найбуйнейшай грамадскай структуры "свайго чалавека". Сустракаючыся з Козікам перад абраннем на пасаду старшыні ФПБ у ліпені 2002 года Лукашэнка, у прыватнасці, заявіў: кіраўніцтва краіны зацікаўлена ў тым, каб прафсаюзы сталі моцнай арганізацыяй — адной з асноў дзяржавы. Пры гэтым Лукашэнка падкрэсліў, што прафсаюзы заўсёды могуць разлічваць на падтрымку дзяржавы і асабіста яго як прэзідэнта.

Менавіта пры Козіку ФПБ атрымала права выкарыстоўваць у сваёй назве назву дзяржавы, што забаронена іншым грамадскім структурам. Згодна з указам прэзідэнта ад 25 лістапада 2002 года прафцэнтр называецца "Федэрацыя прафсаюзаў Беларусі", тады як раней называлася "Федэрацыя прафсаюзаў Беларуская".

У 2003 годзе Козік выступаў з ініцыятывай аб працягу тэрміну прэзідэнцкіх паўнамоцтваў Лукашэнкі. Каментуючы прапанову прафсаюзаў Азербайджана пераабраць Гейдара Аліева на наступны прэзідэнцкі тэрмін, Козік, у прыватнасці, заявіў: "Так, бачыце, Аліева можна вылучыць іх прафсаюзу, а нам нельга, ці што? Чаму... мне кажуць: "Козік, ты не можаш?" Прыйдзе час — я таксама вылучу нашага прэзідэнта або праініцыюю рашэнне па трэцім, пятым там тэрміне... Трэба наогул убраць усе тэрміны. Ніякіх тэрмінаў не павінна быць — чаго народ хоча, тое народ робіць".

У ліпені 2011 года Козік прапанаваў уручыць Аляксандру Лукашэнку Нобелеўскую прэмію ў галіне эканомікі. "Ідэя Аляксандра Лукашэнкі аб неабходнасці пабудовы сацыяльна арыентаванай дзяржавы заслугоўвае Нобелеўскай прэміі ў галіне эканомікі. Пройдзе дзясяткі два гадоў, і я ўпэўнены, што сучасныя эканамісты сфармулююць матрыцу эканамічных механізмаў, якія дазволяць вырашаць задачы такога грамадства", — заявіў Козік у інтэрв'ю газеце ФПБ "Беларускі час".

Таццяна Каравянкова, БелаПАН.

Аўтарызацыя

Імя:
Пароль:

Архіў

  • дзень
  • месяц
  • год

Сюжэты


© 2000 — 2020 БелаПАН. Усе правы абароненыя.
Уся інфармацыя, размешчаная на гэтым сайце, прызначана толькі для персанальнага выкарыстання і не падлягае далейшаму ўзнаўленню і/або распаўсюджванню ў любой форме інакш як з пісьмовага дазволу БелаПАН