Беларуская інфармацыйная кампанія
Адрас старонкі: https://by.belapan.by/archive/2014/10/16/733763_733764/
Дата раздрукоўкі: 19.11.2019 06:42
16.10.2014 09:46 Палітыка

Лідары вядучых краін свету падтрымалі мінскі пратакол

Берлін — Мінск, 16 кастрычніка. Лідары ЗША і вядучых краін ЕС напярэдадні саміту дзяржаў Еўрасаюза і Азіі ў Мілане правялі сумесную відэаканферэнцыю, у ходзе якой падтрымалі падпісаны 5 верасня ў Мінску пратакол аб мірным урэгуляванні сітуацыі на ўсходзе Украіны.
Сітуацыя ва Украіне разам з распаўсюджваннем ліхаманкі Эбола і барацьбой з радыкальнымі ісламістамі ў Іраку і Сірыі стала адной з трох тэм, якую абмеркавалі сусветныя лідары: прэзідэнт ЗША Барак Абама, канцлер Германіі Ангела Меркель, прэзідэнт Францыі Франсуа Аланд, прэм'ер-міністр Вялікабрытаніі Дэвід Кэмеран і прэм'ер-міністр Італіі Матэа Рэнцы.

"Кіраўнікі дзяржаў і ўрадаў падкрэслілі важнасць поўнай і эфектыўнай рэалізацыі мінскага пратакола ад 5 верасня, перш за ўсё ў частцы гарантыі поўнага спынення агню, адводу войскаў, кантролю расійска-ўкраінская мяжы АБСЕ і працягу вызвалення палонных", — гаворыцца ў паведамленні Елісейскага палаца — рэзідэнцыі прэзідэнта Францыі.

Лідары выказаліся за аднаўленне ва Украіне нацыянальнага дыялогу і працяг дэцэнтралізацыі. У ходзе відэаканферэнцыі было падкрэслена, што запланаваная на палях саміту ў Мілане (16—17 кастрычніка) сустрэча прэзідэнтаў Украіны Пятра Парашэнкі і Расіі Уладзіміра Пуціна павінна паслужыць прагрэсу "з пункту гледжання палітычнага вырашэння крызісу".

15 кастрычніка ў Берліне на прэс-канферэнцыі па выніках перамоў з прэм'ер-міністрам В'етнама Нгуенам Тан Зунгам Ангела Меркель паведаміла, што будзе абмяркоўваць "увесь спектр пытанняў, звязаных з Украінай", на сустрэчы з Пуціным у Мілане. "Гэта і газ, і мінскае пагадненне, — сказала яна. — Я чакаю адкрытага абмену думкамі і прагрэсу ў рэалізацыі гэтага дакумента. Гэты прагрэс яшчэ не дасягнуты. Таму мы будзем гаварыць аб тым, як мінскае пагадненне пераўтварыць у жыццё".

У той жа дзень Пётр Парашэнка ў Кіеве на перамовах з кіраўніком спецыяльнай маніторынгавай місіі АБСЕ Эртугрулам Апаканам заявіў, што праз месяц пасля падпісання ў Мінску пратакола ўдзельнікамі трохбаковай кантактнай групы па Украіне і сепаратыстамі не ўдалося дасягнуць міру ў Луганскай і Данецкай абласцях. Як паведамляе прэс-служба прэзідэнта, Парашэнка падкрэсліў, што, нягледзячы на напады баевікоў, украінскія войскі з вялікай адказнасцю ставяцца да выканання рэжыму спынення агню.
Дзмітрый Уласаў, БелаПАН.

Аўтарызацыя

Імя:
Пароль:

Архіў

  • дзень
  • месяц
  • год

Сюжэты


© 2000 — 2019 БелаПАН. Усе правы абароненыя.
Уся інфармацыя, размешчаная на гэтым сайце, прызначана толькі для персанальнага выкарыстання і не падлягае далейшаму ўзнаўленню і/або распаўсюджванню ў любой форме інакш як з пісьмовага дазволу БелаПАН