Беларуская інфармацыйная кампанія
Адрас старонкі: https://by.belapan.by/archive/2014/12/18/747952_747955/
Дата раздрукоўкі: 19.10.2019 12:31
18.12.2014 18:27 Грамадства, Палітыка

Ва Украіне аднавілі трансляцыю тэлеканала "Беларусь 24"

Мінск, 18 снежня. Нацыянальны савет па пытаннях тэлебачання і радыёвяшчання Украіны прызнаў, што беларускі тэлеканал "Беларусь 24" адпавядае патрабаванням Еўрапейскай канвенцыі аб трансгранічным тэлебачанні і ўкраінскага заканадаўства і дазволіў аднавіць яго трансляцыю на тэрыторыі краіны. Такое рашэнне прынята на пасяджэнні савета 18 снежня, паведамляе Інтэрфакс-Украіна.

Паводле слоў кіраўніка ведамства Юрыя Арцеменкі, тэлеканал у лісце рэгулятару растлумачыў, што праграма, у якой раней былі зафіксаваныя парушэнні, была знятая з эфіру, што пасля пацвердзіў і маніторынг Нацсавета.

Нагадаем, 15 кастрычніка Нацыянальны савет па пытаннях тэлебачання і радыёвяшчання Украіны заявіў пра магчымую забарону трансляцыі тэлеканалаў "Беларусь 24" і "365 дзён" (Расія) у сувязі з тым, што іх змест не адпавядае патрабаванням Еўрапейскай канвенцыі аб трансгранічным тэлебачанні і адпаведнаму заканадаўству Украіны. У Нацсавете заявілі, што 1 кастрычніка быў праведзены выбарачны маніторынг кантэнту канала "Беларусь 24", вынікі якога "сведчаць пра наяўнасць у перадачы "Правы чалавека. Погляд у свет" антыўкраінскай прапаганды і скажэння інфармацыі пра палітычныя падзеі ва Украіне".

У сваю чаргу Белтэлерадыёкампанія заявіла, што ў яе "выклікае шкадаванне той факт, што, прымаючы рашэнне пра забарону рэтрансляцыі "Беларусь 24", украінскія чыноўнікі ад журналістыкі не ўбачылі розніцы паміж аўтарскім поглядам канкрэтнага журналіста і палітыкай тэлеканала ў цэлым". Паводле меркавання кампаніі, той факт, што падставай для забароны стаў сюжэт у аўтарскай праграме, якая выходзіць у эфір адзін раз у тыдзень, "зусім не вяжацца з паняццем "свабода слова". У той жа час яны выказалі надзею, што "пытанне аб рэтрансляцыі "Беларусь 24" будзе вырашана аб'ектыўна і з улікам палітыкі канала ў цэлым".

Пазней стала вядома, што праграма Яўгена Новікава "Правы чалавека. Погляд у свет" знятая з эфіру, а вядучаму прапанавана распрацаваць новы тэлепраект.

Анастасія Салановіч, БелаПАН.

Аўтарызацыя

Імя:
Пароль:

Архіў

  • дзень
  • месяц
  • год

Сюжэты


© 2000 — 2019 БелаПАН. Усе правы абароненыя.
Уся інфармацыя, размешчаная на гэтым сайце, прызначана толькі для персанальнага выкарыстання і не падлягае далейшаму ўзнаўленню і/або распаўсюджванню ў любой форме інакш як з пісьмовага дазволу БелаПАН