У Мінску пачалося пасяджэнне рабочай падгрупы па палітычных пытаннях урэгулявання сітуацыі на паўднёвым усходзе Украіны

Мінск, 28 ліпеня. 28 ліпеня ў "Прэзідэнт-гатэлі" ў Мінску пачалося пасяджэнне падгрупы па палітычных пытаннях трохбаковай кантактнай групы па ўрэгуляванні сітуацыі на паўднёвым усходзе Украіны (Украіна — АБСЕ — Расія).

Перамовы праходзяць у закрытым для прэсы рэжыме, паведамляе ў "Твітары" Міністэрства замежных спраў Беларусі.

Напярэдадні пасяджэння прадстаўнік самаабвешчанай Луганскай народнай рэспублікі Уладзіслаў Дзяйнега паведаміў, што "пытанні на сустрэчы будуць усё тыя ж: статус ЛНР і ДНР, выбары і канстытуцыйная рэформа".

Нагадаем, у ліпені ўдзельнікі падгрупы па палітычных пытаннях сустракаюцца штотыднёва. Змест перамоў з удзельнікамі ніяк не каментуецца.

Папярэднія перамовы трохбаковай кантактнай групы, а таксама ўсіх чатырох яе падгруп (па эканоміцы, бяспецы, гуманітарных і палітычных пытаннях) праходзілі ў Мінску 21 ліпеня. Тады бакі ўзгаднілі тэкст дакумента аб адводзе ўзбраенняў калібрам да 100 мм ад лініі сутыкнення на Данбасе, але падпісаны ён не быў.