Беларуская інфармацыйная кампанія
Адрас старонкі: https://by.belapan.by/archive/2015/08/02/792049_792050/
Дата раздрукоўкі: 23.09.2019 09:55
02.08.2015 15:18 Палітыка

Перад чарговай сустрэчай кантактнай групы ў Мінску баевікі ўзмацнілі агонь, паведамляюць украінскія ваенныя

Мінск, 2 жніўня. Перад чарговай сустрэчай кантактнай групы ў Мінску баевікі ўзмацнілі агонь, заявіў украінскі бок Сумеснага цэнтра па кантролі і каардынацыі пытанняў спынення агню і стабілізацыі на лініі размежавання бакоў, у склад якога ўваходзяць прадстаўнікі Украіны, Расіі, а таксама самаабвешчаных ДНР і ЛНР.

"21.00 31 ліпеня да 03.28 1 жніўня расійска-тэрарыстычныя групоўкі вялі масіраваны агонь практычна ўздоўж усёй лініі размежавання ў Данецкай і Луганскай абласцях. Пад шквальны агонь трапілі пазіцыі падраздзяленняў Узброеных сіл Украіны, а таксам навакольныя мірныя населеныя пункты прыфрантавой зоны — Аўдзееўка, Вопытнае, Пяскі, Мар'інка, Краснагораўка, Маёрск, Луганскае, Зайцава і іншыя", — цытуе тэкст заявы Сумеснага цэнтра прэс-цэнтр Антытэрарыстычнай аперацыі (АТА) на сваёй старонцы ў "Фэйсбуку".

Зазначаецца таксама, што большасць зваротаў аб спыненні агню баевікі ігнаравалі.

Кіраўніцтва ўкраінскага боку Сумеснага цэнтра па кантролі і каардынацыі "ацэньвае гэтую сітуацыю як чарговую спробу эскалацыі канфлікту". "Асабліва цынічным гэта выглядае на фоне чарговага раўнда Мінскіх перамоў, якія запланаваныя на 3 жніўня, і расцэньваецца як спроба сарваць гэтыя перамовы", — падкрэсліваецца ў заяве.

Такім чынам, Сумесны цэнтр пацвердзіў інфармацыю пра падрыхтоўку 3 жніўня ў Мінску пасяджэння трохбаковай кантактнай групы па ўрэгуляванні сітуацыі на паўднёвым усходзе Украіны (Украіна — АБСЕ — Расія).

Апошні раз кантактная група збіралася ў беларускай сталіцы 21 ліпеня. Пасяджэнне праходзіла адразу пасля перамоў чатырох падгруп (па эканоміцы, бяспецы, гуманітарных і палітычных пытаннях). Бакі тады ўзгаднілі тэкст дакумента аб адводзе ўзбраенняў калібрам да 100 мм ад лініі сутыкнення на Данбасе, але падпісаны не быў.

28 ліпеня ў Мінску адбылося пасяджэнне падгрупы па палітычных пытаннях. Змест перамоў невядомы. МЗС Беларусі толькі паведаміў, што пра вынікі сустрэчы падгрупы будзе паведамлена трохбаковай кантактнай групе.

БелаПАН.

Аўтарызацыя

Імя:
Пароль:

Архіў

  • дзень
  • месяц
  • год

Сюжэты


© 2000 — 2019 БелаПАН. Усе правы абароненыя.
Уся інфармацыя, размешчаная на гэтым сайце, прызначана толькі для персанальнага выкарыстання і не падлягае далейшаму ўзнаўленню і/або распаўсюджванню ў любой форме інакш як з пісьмовага дазволу БелаПАН