Беларуская інфармацыйная кампанія
Адрас старонкі: https://by.belapan.by/archive/2016/08/01/858192/
Дата раздрукоўкі: 10.12.2018 10:26
01.08.2016 17:38 Грамадства, Культура

У Лаўрышаўскім манастыры знойдзеныя невядомыя раней саркафагі

Мінск, 1 жніўня. У Свята-Елісееўскім Лаўрышаўскім мужчынскім манастыры ў Навагрудскім раёне падчас археалагічных даследаванняў выяўленыя два невядомыя раней саркафагі.

Як паведаміў БелаПАН памочнік кіраўніка экспедыцыі гісторык Тэльман Маслюкоў, мяркуецца, што ў іх былі пахаваныя асобы, якія маюць высокае значэнне для манастыра і пакінулі значны след у гісторыі краіны. Зараз праводзіцца экспертыза з мэтаю атрымання больш дакладных звестак.

Археалагічныя раскопкі сёлетняга сезона завяршыліся ў манастыры на мінулым тыдні, адзначае Маслюкоў. Лаўрышаўская археалагічная экспедыцыя па просьбе ігумена манастыра Яўсевія праводзіла, у прыватнасці, расчыстку падземнага збудавання ў манастырскім Свята-Успенскім храме ў вёсцы Лаўрышава (Шчорсаўскі сельсавет).

Калі праз вузкі пралом у зводзе склепа быў выняты слой пяску, якім было засыпанае падземнае памяшканне, то ў склепе знайшлі два цагляныя саркафагі.
 
"У абодвух меліся касцявыя астанкі людзей і культавыя прадметы. Расчышчаны таксама спуск у гэтую крыпту, які вёў непасрэдна з памяшкання храма. Вызначана, што крыпта была засыпаная ў сярэдзіне XIX стагоддзя, верагодна, пры закрыцці манастыра ў 1836 годзе", — паведамляе вучоны.

Цяпер атрыманыя пры раскопках матэрыялы вывучаюцца ў аддзеле антрапалогіі Інстытута гісторыі Нацыянальнай акадэміі навук Беларусі і цэнтральнай лабараторыі дзяржаўнага ўнітарнага прадпрыемства "Навукова-вытворчы цэнтр па геалогіі".

Храм у Лаўрышаве быў пабудаваны ў XVIII стагоддзі, але, як мяркуюць даследчыкі, пахаванні могуць адносіцца і да больш ранніх часоў. Лаўрышаўскі манастыр заснавалі ў сярэдзіне ХIII стагоддзя Войшалк Міндоўгавіч (вялікі князь Вялікага Княства Літоўскага ў 1264—1267 гадах) і прападобны ігумен Елісей. Манастыр быў звязаны з вялікакняжацкім домам ВКЛ і на працягу некалькіх стагоддзяў з`яўляўся адным з найважнейшых духоўных цэнтраў Беларусі. Дзейнасць манастыра адноўленая ў 2007 годзе.

Археалагічныя даследаванні ў Лаўрышаве вядуцца шосты год пад кіраўніцтвам прафесара гісторыі Сяргея Рассадзіна, з добраславення мітрапаліта Мінскага і Заслаўскага Паўла, патрыяршага экзарха ўсяе Беларусі. У праваслаўным археалагічным лагеры, які быў арганізаваны ў ходзе экспедыцыі, удзельнічалі валанцёры — студэнты і навучэнцы з розных абласцей краіны.

Ірына Турчына, БелаПАН.

Аўтарызацыя

Імя:
Пароль:

Архіў

  • дзень
  • месяц
  • год

Сюжэты


© 2000 — 2018 БелаПАН. Усе правы абароненыя.
Уся інфармацыя, размешчаная на гэтым сайце, прызначана толькі для персанальнага выкарыстання і не падлягае далейшаму ўзнаўленню і/або распаўсюджванню ў любой форме інакш як з пісьмовага дазволу БелаПАН