Беларуская інфармацыйная кампанія
Адрас старонкі: https://by.belapan.by/archive/2017/01/06/882841_111222/
Дата раздрукоўкі: 23.08.2019 11:51
06.01.2017 12:22 Грамадства

Забітая ігумення Cвята-Ксеніеўскага манастыра матухна Васіліса (дапоўнена)

фота: mlyn.by
Мінск, 6 студзеня. У вёсцы Барань Барысаўскага раёна забітая ігумення Cвята-Ксеніеўскага жаночага манастыра матухна Васіліса. Злачынства было здзейсненае 5 студзеня пасля 21.00. Затрымана падазроная.
Як паведаміла БелаПАН афіцыйны прадстаўнік упраўлення Следчага камітэта па Мінскай вобласці Таццяна Беланог, па факце забойства ігуменні распачатая справа на падставе арт. 139 КК. У дачыненні да падазронай прызначаная псіхолага-псіхіятрычная экспертыза.

"Упраўленне СК па Мінскай вобласці ўсебакова разбіраецца ў абставінах здарэння, — сказала Беланог. — З удзельнікамі трагічнай падзеі працуюць следчыя. Кіраўніцтвам УСК ход высвятлення абставінаў здарэння ўзяты на кантроль".

Паводле інфармацыі Барысаўскай епархіі Беларускай праваслаўнай царквы, у нападзе на ігуменню Свята-Ксеніеўскага жаночага манастыра матухну Васілісу падазраецца 29-гадовая грамадзянка Казахстана, якая жыве пры манастыры. Яе часова прытулілі ў манастыры, жадаючы дапамагчы ў вырашэнні жыццёвых праблем. "На працягу яе знаходжання ў манастыры, асабліва напярэдадні таго, што здарылася, адзначалася псіхічнае расстройства маладой жанчыны, якое і стала прычынай яе страшнага ўчынку", — паведамляе прэс-служба епархіі.

Раніцай 6 студзеня ў манастыры прайшла памінальная служба па ігуменні Васілісе, якую ўзначаліў епіскап Барысаўскі і Мар`інагорскі Веньямін. У малітве ўзялі ўдзел сёстры манастыра, а таксама прадстаўнікі абласной і раённай адміністрацыі — намеснік старшыні Мінаблвыканкама Віктар Сірэнка і кіраўнік райвыканкама Уладзімір Мірановіч.

Развітанне з памерлай адбудзецца 8 студзеня.

Згодна з інфармацыяй сайта Cвята-Ксеніеўскага манастыра, ігумення Васіліса (Мядзведзь) нарадзілася 10 сакавіка 1949 года ў горадзе Сосніца Чарнігаўскай вобласці (Украіна). Скончыла гістарычны факультэт Чарнігаўскага педагагічнага інстытута. Выкладала ў школе. Была прыхаджанкай Петра-Паўлаўскага сабора ў Мінску, затым пасля ўтварэння Елізавецінскага сястрынства пры саборы стала сястрой міласэрнасці. У 2001 годзе служыла паслушніцай Свята-Елісавецінскага жаночага манастыра пад Мінскам, потым прыняла пострыг. З 2004 года з благаславення мітрапаліта Мінскага і Слуцкага Філарэта, патрыяршага экзарха ўсяе Беларусі, — ігумення Свята-Ксеніеўскага жаночага манастыра ў вёсцы Барань Барысаўскага раёна.
Вячаслаў Будкевіч, Ірына Турчына, БелаПАН.

Аўтарызацыя

Імя:
Пароль:

Архіў

  • дзень
  • месяц
  • год

Сюжэты


© 2000 — 2019 БелаПАН. Усе правы абароненыя.
Уся інфармацыя, размешчаная на гэтым сайце, прызначана толькі для персанальнага выкарыстання і не падлягае далейшаму ўзнаўленню і/або распаўсюджванню ў любой форме інакш як з пісьмовага дазволу БелаПАН