Беларуская інфармацыйная кампанія
Адрас старонкі: https://by.belapan.by/archive/2017/02/03/887088_123456/
Дата раздрукоўкі: 24.09.2020 01:06
03.02.2017 16:44 Палітыка

Лукашэнка: Калі расійскія войскі будуць уведзеныя ў Беларусь, то роўненька адсюль і пойдуць

Мінск, 3 лютага. На сустрэчы з прадстаўнікамі СМІ і грамадскасці 3 лютага Аляксандр Лукашэнка пракаментаваў меркаванні аб тым, што Расія збіраецца акупаваць Беларусь.

"Калі нехта думае, што ўжо некалькі тысяч вагонаў загрузілі і нас акупуюць, Расія ўводзіць сюды свае войскі, — не будзьце вы наіўнымі. Што, Расія наогул ужо з глузду з`ехала і не ўмее ваяваць? Як жа можна ваяваць на чыгуначных платформах? Тое, што будуць войскі сюды ўведзеныя, то роўненька яны адсюль і пойдуць. Сёння нават не агаворваецца такая сітуацыя. Войскі высадзяць недзе каля палігона, разаб`юць лагер (у рамках вучэнняў "Захад-2017". — БелаПАН.), там будзе мізер баявых прыпасаў — толькі каб адстраляць па мішэнях, астатняе — халастыя боепрыпасы. Усё пад кантролем", — запэўніў Лукашэнка.

Ён адзначыў, што прапанаваў Уладзіміру Пуціну праводзіць сумесныя ваенныя вучэнні раз на два гады — па чарзе ў Расіі і Беларусі. "Надышоў наш час, і мы прымем гэтыя вучэнні. Гэта будуць адкрытыя вучэнні, мы запросім усіх", — падкрэсліў прэзідэнт.

Гаворачы аб стварэнні ў Беларусі расійскай авіяцыйнай ваеннай базы, Лукашэнка адзначыў, што не бачыць у гэтым неабходнасці. "Ды кіньце вы. Каму патрэбныя гэтыя 10 самалётаў, якія Расія хацела пасадзіць у Бабруйску? Я Пуціну кажу: трэба аднаўляць гэты аэрадром, там ужо ўзлётна-пасадачную паласу напалову разабралі, навошта 10 самалётаў? Вы дайце мне 20 самалётаў, у нас выдатныя пілоты, выдатная школа. Вы ведаеце, што мы ваюем не горш на ваенных самалётах, вы нам дайце 20 самалётаў, мы ж адзіная групоўка. Не", — сказаў кіраўнік дзяржавы.

Паводле слоў Лукашэнкі, у сучаснай вайне самалёт здольны весці 10 хвілін бою. "Ён узляцеў, і яго няма. Вайна сёння іншая. Гэта ў Сірыі можна лётаць, калі няма сістэмы СПА. У нас нават у Беларусі: ты ўзляцеў дзесьці за 200 кіламетраў, мы цябе бачым, і тваё жыццё скончанае. І потым, што такое аэрадром на пярэднім краі тэатра ваенных дзеянняў? Не дай бог вайна, дзве ракеты на ўзлётна-пасадачнай паласе  — ні адзін самалёт не ўзляціць. Навошта іх сюды?" — сказаў ён.

Час падлёту самалётаў са Смаленска — чатыры хвіліны, дадаў Лукашэнка. Паводле яго слоў, і Уладзімір Пуцін падчас абмеркавання гэтага пытання пагадзіўся з тым, што расійская база ў Беларусі не патрэбная. "Навошта тады перад прэзідэнцкімі выбарамі, калі быццам бы нейкія рухі з Захадам пайшлі, мы базу тут хочам? Дык не базу, а 10 ці 20 самалётаў пасадзіць хацелі — гэта дэманстрацыя. Яна нам патрэбна, гэтая дэманстрацыя? Не. У нас сваіх хапае такіх самалётаў, але калі яшчэ 20 вы сюды перакінеце, няма пытанняў", — адзначыў Лукашэнка.

Ён таксама расказаў, што напярэдадні чэмпіянату свету па хакеі ў 2014 годзе Беларусь прапанавала Расіі накіраваць сюды звяно знішчальнікаў для сумеснай арганізацыі бяспекі. "Яны перагналі чатыры самалёты ў Баранавічы, расіяне ў Беларусі адпрацавалі. Я думаў: адпрацавалі, і добра, пакінуць гэтыя самалёты. Не, забралі, давай базу. Навошта? Усё ўжо адпрацавана, усё нармальна з пункта гледжання ваенных, няхай служаць далей — рускі чалавек і беларус у адным самалёце. Не, забралі — давай базу", — сказаў кіраўнік дзяржавы. Гэтая прапанова была не ваенным, лічыць ён.
Анастасія Салановіч, БелаПАН.

Аўтарызацыя

Імя:
Пароль:

Архіў

  • дзень
  • месяц
  • год

Сюжэты


© 2000 — 2020 БелаПАН. Усе правы абароненыя.
Уся інфармацыя, размешчаная на гэтым сайце, прызначана толькі для персанальнага выкарыстання і не падлягае далейшаму ўзнаўленню і/або распаўсюджванню ў любой форме інакш як з пісьмовага дазволу БелаПАН

.239