Беларуская інфармацыйная кампанія
Адрас старонкі: https://by.belapan.by/archive/2017/04/04/897236_589647/
Дата раздрукоўкі: 28.05.2020 17:10
04.04.2017 13:24 Фінансы, Эканоміка

Расія рэфінансуе даўгі Беларусі ў 2017 годзе

Мінск, 4 красавіка. У 2017 годзе Расія цалкам рэфінансуе ўсе даўгавыя абавязацельствы Беларусі ў памеры 750-800 млн долараў. Гэта вынікае з заявы першага віцэ-прэм'ера Беларусі Васіля Мацюшэўскага, размешчанай 4 красавіка на сайце Савета міністраў.
Як адзначае віцэ-прэм'ер, гэтае пытанне абмяркоўвалася 3 красавіка на сустрэчы прэзідэнтаў Беларусі і Расіі, "дасягнутае прынцыповае рашэнне аб рэфінансаванні сёлета даўгавых абавязацельстваў Беларусі".

"Гаворка ішла аб рэфінансаванні тых даўгоў, якія ў нас сфармаваліся ў межах нашага двухбаковага парадку дня. Гэтае пытанне разглядалася яшчэ летась, і цяпер мы вярнуліся да яго і знайшлі магчымае прынцыповае вырашэнне", — адзначыў Мацюшэўскі.

Паводле яго інфармацыі, у выніку дасягнутых кіраўнікамі дзяржаў дамоўленасцяў Расія рэфінансуе ўсе даўгавыя абавязацельствы Беларусі, якія прыпадаюць на 2017 год. "Мы гаворым пра рэфінансаванне доўгу, які ў нас да пагашэння ў межах нашых міждзяржаўных крэдытаў па гэтым годзе. Гэта прыблізна 750-800 млн — асноўны доўг і сума працэнтаў да пагашэння сёлета", — растлумачыў віцэ-прэм'ер.

Варта адзначыць, што плацяжы Беларусі па знешнім і ўнутраным дзяржаўным доўгу сёлета складаюць прыкладна 3,5 млрд долараў. З іх на плацяжы па знешнім доўгу плануецца накіраваць 1,8 млрд долараў, па ўнутраным — 1,7 млрд. Самыя буйныя сумы ў кошт пагашэння знешняга дзярждоўгу сёлета Беларусь павінна пералічыць Расіі (741,3 млн долараў), Еўразійскаму фонду стабілізацыі і развіцця (487,9 млн) і Кітаю (381,7 млн).

Мацюшэўскі таксама паведаміў, што Аляксандр Лукашэнка і Уладзімір Пуцін 3 красавіка абмяркоўвалі і "ўзаемадзеянне Беларусі з Еўразійскім фондам стабілізацыі і развіцця".

"Уладзімір Пуцін быў праінфармаваны аб рэалізацыі Беларуссю праграмы ў межах Еўразійскай фонду стабілізацыі і развіцця, пэўных пытаннях і шурпатасцях, якія былі ў межах рэалізацыі гэтай праграмы", — адзначыў віцэ-прэм'ер.

На яго думку, гэтыя пытанні не маюць прынцыповага характару. "На ўзроўні прэзідэнта Расіі мы атрымалі падтрымку нашым ініцыятывам у частцы далейшага працягу гэтай праграмы. Уладзімір Пуцін абяцаў усяляк садзейнічаць, каб праграма з ЕФСР працягвалася", — заявіў Мацюшэўскі.

Вясной 2016 года беларускія ўлады падпісалі крэдытную праграму аб атрыманні з Еўразійскай фонду стабілізацыі і развіцця крэдыту на 2 млрд долараў, які выдаецца сямю траншамі. Для атрымання траншаў беларускія ўлады павінны рэалізаваць комплекс мер па рэфармаванні эканомікі.

На гэты момант беларускі бок атрымаў два траншы еўразійскага крэдыту — 500 млн долараў у сакавіку 2016 года, 300 млн долараў — у ліпені. Мінфін Беларусі раней разлічваў атрымаць трэці транш крэдыту ЕФСР (таксама на 300 млн долараў) у кастрычніку 2016 года, аднак гэтага не адбылося.

Пасяджэнне савета ЕФСР, у якім старшынюе міністр фінансаў Расіі, сёлета не праводзілася.

Беларускія аналітыкі лічаць, што затрымка з даваннем трэцяга траншу еўразійскага крэдыту — следства нафтагазавай спрэчкі, якую Масква і Мінск не маглі ўрэгуляваць больш за год.
Дзмітрый Заяц, БелаПАН.

Аўтарызацыя

Імя:
Пароль:

Архіў

  • дзень
  • месяц
  • год

Сюжэты


© 2000 — 2020 БелаПАН. Усе правы абароненыя.
Уся інфармацыя, размешчаная на гэтым сайце, прызначана толькі для персанальнага выкарыстання і не падлягае далейшаму ўзнаўленню і/або распаўсюджванню ў любой форме інакш як з пісьмовага дазволу БелаПАН

.239