Беларуская інфармацыйная кампанія
Адрас старонкі: https://by.belapan.by/archive/2017/06/27/909373_12345/
Дата раздрукоўкі: 27.05.2019 06:06
27.06.2017 09:35 Палітыка, Эканоміка, Грамадства

Мясніковіч: Законы павінны адпавядаць жаданням грамадства

Мінск, 27 чэрвеня. "Важна, каб да прыманых законаў была сацыяльная лаяльнасць, каб яны адпавядалі жаданням грамадства", — заявіў старшыня Савета Рэспублікі Нацыянальнага сходу Беларусі Міхаіл Мясніковіч, выступаючы 26 чэрвеня на закрыцці другой сесіі верхняй палаты шостага склікання.
Паводле яго слоў, пры фарміраванні плана падрыхтоўкі законапраектаў на 2018 год Саветам Рэспублікі прапанавана ўключыць у яго законы, якія адпавядаюць названым мэтам. Гэта — законапраекты аб электраэнергетыцы, аб карэкціроўцы законаў пра падтрымку малога і сярэдняга прадпрымальніцтва, аб абыходжанні з адходамі, аб рэкламе, аб адміністрацыйных правапарушэннях у сферы антыманапольнага рэгулявання і многае іншае.

Да восеньскай сесіі, як адзначыў Мясніковіч, "трэба будзе вырашыць шмат адказных задач па дадатковых мерах па забеспячэнні эканамічнай бяспекі і сацыяльнай стабільнасці".

Цяпер Савет Рэспублікі па даручэнні прэзідэнта завяршае падрыхтоўку законапраекта аб унясенні паправак у закон аб аўтарскім праве і сумежных правах. "Ёсць тут цэлы шэраг спрэчных пытанняў, якія трэба зняць найбліжэйшым часам. У кастрычніку гэты праект закона будзе ўнесены ў Палату прадстаўнікоў", — сказаў старшыня СР НС.

"У міжсесійны перыяд варта засяродзіцца на вырашэнні задач, якія спрыяюць дынамічнаму сацыяльна-эканамічнаму развіццю краіны", — заявіў ён.

Важнай, паводле слоў Мясніковіча, уяўляецца падрыхтоўка асноўнага фінансавага дакумента краіны — закона аб рэспубліканскім бюджэце на 2018 год, а таксама законапраектаў, якія ўдасканальваюць падатковую сістэму і ўпарадкоўваюць бюджэтныя адносіны.

Таксама трэба будзе праца над законапраектамі, скіраванымі на карэкціроўку нормаў Банкаўскага кодэкса, законаў "Аб неплацежаздольнасці і банкруцтве", "Аб абароне правоў спажыўцоў", сказаў Мясніковіч. У перспектыве будзе работа па карэкціроўцы законаў "Аб інвестыцыях", "Аб прыватызацыі дзяржаўнай маёмасці і пераўтварэнні дзяржаўных унітарных прадпрыемстваў у адкрытыя акцыянерныя таварыствы" і шэрагу іншых.
Вячаслаў Будкевіч, БелаПАН.

Аўтарызацыя

Імя:
Пароль:

Архіў

  • дзень
  • месяц
  • год

Сюжэты


© 2000 — 2019 БелаПАН. Усе правы абароненыя.
Уся інфармацыя, размешчаная на гэтым сайце, прызначана толькі для персанальнага выкарыстання і не падлягае далейшаму ўзнаўленню і/або распаўсюджванню ў любой форме інакш як з пісьмовага дазволу БелаПАН