Беларуская інфармацыйная кампанія
Адрас старонкі: https://by.belapan.by/archive/2017/08/18/916379_445663/
Дата раздрукоўкі: 25.09.2020 03:30
18.08.2017 19:12 Эканоміка, Грамадства

Тарыфы на жыллёва-камунальныя паслугі вырастуць у верасні і снежні

Мінск, 18 жніўня. Тарыфы на жыллёва-камунальныя паслугі ў Беларусі будуць індэксаваныя ў верасні і снежні, паведаміў у прэзідыуме Савета Рэспублікі намеснік міністра антыманапольнага рэгулявання і гандлю Іван Вежнавец.
"Спажыўцы з 1 верасня гэтага года заплацяць на 8% больш за камунальныя паслугі. Але, яшчэ раз звярну ўвагу, што гэтая індэксацыя або гэты рост абумоўленыя ростам даходаў насельніцтва, як гэта і прадугледжана дзейным заканадаўствам і той практыкай, што склалася ўжо на працягу некалькіх гадоў. з 1 снежня мы плануем, зноў жа зыходзячы з росту заработнай платы, якая будзе адбывацца, мы ацэньваем, што рост індэксацыі складзе прыблізна 10%, — адпаведным чынам павысяцца і тарыфы для насельніцтва", — перадае тэлеканал СТВ выступ намесніка кіраўніка МАРГ на пасяджэнні прэзідыума Савета Рэспублікі 17 жніўня.

Паводле інфармацыі тэлеканала, беларусаў прапануецца стымуляваць да ўстаноўцы індывідуальных лічыльнікаў цяпла. Эксперты прааналізавалі сітуацыю і прыйшлі да высновы, што неабходна прыняць дадатковыя меры па ўключэнні грамадзян у цеплавую мадэрнізацыю і прыцягненні да эканомнага расходавання цеплаэнергіі. Прапрацоўваецца адпаведны законапраект, які прадугледжвае як сістэму дзяржаўнай падтрымкі, так і ўцягванне сродкаў грамадзян, бо 94% жылфонду знаходзіцца ў прыватнай уласнасці.

Са студзеня наступнага года ў Беларусі плануецца выйсці на 100-працэнтны ўзровень кампенсацыі затрат па ўсіх паслугах ЖКГ, за выключэннем цеплавой энергіі. Ацяпленне і гарачае водазабеспячэнне насельніцтва будзе аплачваць па субсідаваных тарыфах.

Аляксандр Лукашэнка, выступаючы 21 красавіка з пасланнем да народа і парламента, адзначыў: "Мы не можам аднаразова за год-паўтара зрабіць 100% плату жыллёва-камунальных паслуг, таму што будуць велізарныя неплацяжы і гэта дэстабілізуе становішча ў грамадстве". "На 100-працэнтную аплату насельніцтвам паслуг ЖКГ выйдзем не за год-два, а чатыры-пяць гадоў", — сказаў ён.

Лукашэнка запэўніў, што тарыфы будуць павышацца паступова, як і раней, — на пяць долараў у год. "Людзі прывыклі да гэтага. Павышаем па пяць долараў, каб дасягнуць 100%. І зробім гэта не за паўтара года, а за чатыры-пяць — зробім. Проста зламаць сістэму, а вось стварыць новае будзе значна складаней. Будзьце больш акуратнымі. У нас створаная сістэма, яе трэба прымусіць працаваць", — заявіў кіраўнік дзяржавы.
Аляксей Арэшка, БелаПАН.

Аўтарызацыя

Імя:
Пароль:

Архіў

  • дзень
  • месяц
  • год

Сюжэты


© 2000 — 2020 БелаПАН. Усе правы абароненыя.
Уся інфармацыя, размешчаная на гэтым сайце, прызначана толькі для персанальнага выкарыстання і не падлягае далейшаму ўзнаўленню і/або распаўсюджванню ў любой форме інакш як з пісьмовага дазволу БелаПАН

.239