Беларуская інфармацыйная кампанія
Адрас старонкі: https://by.belapan.by/archive/2017/10/11/924404_924405/
Дата раздрукоўкі: 23.05.2019 03:43
11.10.2017 16:16 Палітыка, Эканоміка

Лукашэнка прапаноўвае "прыводзіць да прытомнасці" постсавецкія структуры

Мінск, 11 кастрычніка. На пасяджэнні Савета кіраўнікоў дзяржаў СНД у Сочы Аляксандр Лукашэнка прапанаваў адмовіцца ад Міжпарламенцкай асамблеі СНД або рэфармаваць яе. Постсавецкія структуры "трэба прыводзіць да прытомнасці", лічыць ён.
"Калі гэтая структура не працуе, можа быць, і адмовіцца ад яе? Хоць мы прапаноўвалі надзяліць яе пэўнымі, канкрэтнымі паўнамоцтвамі. Мы там нейкія мадэльныя законы прымаем, але ні адзін з іх, напрыклад, у Беларусі, не лёг у аснову прыняцця нацыянальнага заканадаўства. Такога ў прынцыпе ніколі не было", — цытуе Лукашэнку прэс-служба прэзідэнта.

"Атрымліваецца, што дэпутаты (Міжпарламенцкай асамблеі СНД. — БелаПАН.) збіраюцца ў Піцеры, быццам бы нешта абмяркоўваюць, гавораць. Але нават мы пра гэта нічога не ведаем, таму што гэта не запатрабавана. Чыноўнікаў плодзім незлічоную колькасць, а толку мала", — канстатаваў Лукашэнка.

Да гэтых пытанняў, падкрэсліў ён, неабходна падысці грунтоўна, "бо нават на ўзроўні кіраўнікоў дзяржаў разглядаюцца не самыя актуальныя і надзённыя праблемы". "Шчыра кажучы, мы і самі тут на высокім узроўні прымаем рашэнні і не заўсёды рэалізоўваем іх. Ды і рашэнні, паглядзіце, не нашага ўзроўню: нейкія заявы і іншае", — сказаў Лукашэнка.

На яго думку, больш важная праблема гандлёва-эканамічнага ўзаемадзеяння, якую беларускі бок падымаў не раз, а таксама тэма бяспекі. "Пытанні бяспекі — яны ўжо не стукаюцца ў дзверы, яны ўжо ў наш дом уварваліся. Мы іх абыходзім сарамліва: ці то мы баімся паставіць гэтыя пытанні, ці то разумеем, што не можам іх вырашыць, — заявіў Лукашэнка. — Робім выгляд, што ўсё ў нас добра, збіраемся, заявы робім, а па сутнасці эфектыўнасць вельмі нізкая. Можа, нам неяк вызначыць кола спецыялістаў, якія б аб`ектыўна нам прапанавалі сур`ёзную рэформу або структурызацыю ў нашай дзейнасці? "

Такія праблемы існуюць і ў Еўразійскім эканамічным саюзе, адзначыў ён, але там больш канкрэтны парадак дня і больш канкрэтныя рашэнні, паколькі значнасць саюза вельмі высокая. "Я б пагадзіўся з тым, каб у ЕАЭС было і парламенцкае вымярэнне, таму што ёсць што там абмяркоўваць. Трэба да прытомнасці прыводзіць нашы постсавецкія структуры", — заявіў Аляксандр Лукашэнка. Ён выказаў упэўненасць, што яго пазіцыю падтрымліваюць кіраўнікі іншых краін.

На сённяшнім пасяджэнні кіраўнікі дзяржаў СНД прынялі заяву аб падтрымцы інстытута сям`і і традыцыйных сямейных каштоўнасцяў, паведамляе дзяржаўнае агенцтва БелТА. Удзельнікі саміту таксама дамовіліся паглыбіць супрацоўніцтва ў барацьбе з тэрарызмам, карупцыяй і прынялі рашэнне аб стварэнні аб`яднанай сістэмы паветрана-касмічнай абароны СНД да 2025 года.
Аляксей Аляксандраў, БелаПАН.

Аўтарызацыя

Імя:
Пароль:

Архіў

  • дзень
  • месяц
  • год

Сюжэты


© 2000 — 2019 БелаПАН. Усе правы абароненыя.
Уся інфармацыя, размешчаная на гэтым сайце, прызначана толькі для персанальнага выкарыстання і не падлягае далейшаму ўзнаўленню і/або распаўсюджванню ў любой форме інакш як з пісьмовага дазволу БелаПАН