Беларуская інфармацыйная кампанія
Адрас старонкі: https://by.belapan.by/archive/2017/11/27/931387_888971/
Дата раздрукоўкі: 28.03.2020 20:08
27.11.2017 12:25 Эканоміка, Грамадства

Раскрытая злачынная схема, звязаная з асваеннем грашовых рэсурсаў у ЖКГ

Мінск, 27 лістапада. Супрацоўнікі службы па барацьбе з эканамічнымі злачынствамі раскрылі злачынную схему ў сферы ЖКГ, якая тычыцца асваення грашовых рэсурсаў, паведамляе Міністэрства ўнутраных спраў Беларусі.
У ліку падазраваных апынуліся кіраўнікі шэрагу дзяржаўных арганізацый, якія аказваюць жыллёва-камунальныя паслугі, а таксама службовыя асобы прыватных прадпрыемстваў. У дачыненні да падазроных распачатыя больш за 50 крымінальных спраў па фактах злоўжывання службовымі паўнамоцтвамі, перавышэння ўлады або службовых паўнамоцтваў, хабарніцтва.

Фігуранты праводзілі закупкі тэхналагічнага абсталявання па завышаным кошце з парушэннем заканадаўства, што прывяло да нерацыянальнага расходавання як бюджэтных, так і ўласных сродкаў камунальных прадпрыемстваў, у сувязі з чым нанесены значны ўрон дзяржаве.

Пад крымінальны пераслед трапілі ужо былыя кіраўнікі больш як 20 арганізацый і прадпрыемстваў, якія аказваюць паслугі ў сферы ЖКГ, па ўсёй краіне.

Падазраваныя за незаконныя ўзнагароджанні прымалі рашэнні аб закупках абсталявання ў фірм-пасрэднікаў па завышанай ад трох да дзесяці разоў цане. Бачнасць законнасці здзелкам надавала іх рэгістрацыя афіляванымі кампаніямі, якія прапаноўвалі купіць такое ж абсталяванне, але яшчэ даражэй.

"Аднак такая прадпрымальнасць не дазволіла ўвесці ў зман аператыўнікаў БЭЗ. Па асобных прадпрыемствах зараз праводзяцца даследчыя праверкі, паводле вынікаў якіх будзе прынятае рашэнне згодна з крымінальна-працэсуальным заканадаўствам", — паведаміла старшы оперупаўнаважаны па асабліва важных справах галоўнага ўпраўлення па барацьбе з эканамічнымі злачынствамі МУС Вераніка Пасмецьева.

Паводле яе слоў, з пачатку года ў сферы ЖКГ улічана ў 5,5 разу больш злачынстваў, чым за аналагічны перыяд мінулага года. З усіх злачынных дзеянняў 88,2% адносяцца да катэгорыі цяжкіх і асабліва цяжкіх. Часцей за ўсё выяўляюць факты крадзяжоў шляхам злоўжывання службовымі паўнамоцтвамі (арт. 210 КК), хабарніцтва (арт. 430 КК), злоўжыванняў службовымі паўнамоцтвамі (арт. 424 КК), перавышэння ўлады або службовых паўнамоцтваў (арт. 426 КК), службовыя падлогі (арт. 427 КК).

У ГУБЭЗ МУС адзначылі, што аператыўна-вышуковыя мерапрыемствы, скіраваныя на выяўленне злачынстваў і правапарушэнняў з боку службовых асоб ЖКГ, у тым ліку якія здзяйсняюцца ў ходзе мадэрнізацыі, капітальных і наяўных рамонтаў жылога фонду, а таксама пры ажыццяўленні закупак за кошт бюджэтных і ўласных сродкаў арганізацый і прадпрыемстваў галіны, праводзяцца штодня. У першую чаргу праверкі скіраваныя на ўсталяванне фактаў прыняцця рашэнняў з карупцыйнымі рызыкамі, неабгрунтаванага фінансавання і аказання дзяржпадтрымкі, лабіравання інтарэсаў фізічных асоб і камерцыйных арганізацый.
Вячаслаў Будкевіч, БелаПАН.

Аўтарызацыя

Імя:
Пароль:

Архіў

  • дзень
  • месяц
  • год

Сюжэты


© 2000 — 2020 БелаПАН. Усе правы абароненыя.
Уся інфармацыя, размешчаная на гэтым сайце, прызначана толькі для персанальнага выкарыстання і не падлягае далейшаму ўзнаўленню і/або распаўсюджванню ў любой форме інакш як з пісьмовага дазволу БелаПАН