Беларуская інфармацыйная кампанія
Адрас старонкі: https://by.belapan.by/archive/2018/01/10/937359_937360/
Дата раздрукоўкі: 26.08.2019 07:39
10.01.2018 15:42 Эканоміка, Грамадства

Гендырэктар Светлагорскага ЦКК: Непрыемны пах ад завода ўстараняецца

Мінск, 10 студзеня. Непрыемны пах ад Светлагорскага цэлюлозна-кардоннага камбіната ўстараняецца. Пра гэта, як паведаміла прэс-служба канцэрна "Беллеспаперапрам", 10 студзеня ў Мінску далажыў генеральны дырэктар ААТ Юрый Крук старшыні канцэрна Юрыю Назараву.

Крук спыніўся на экалагічным пытанні, якое атрымала шырокі грамадскі рэзананс. Ён паведаміў, што ні адна з узятых на аналіз проб паветра і вады не паказала перавышэння гранічна дапушчальных нормаў (канцэнтрацый) выкіду забруджвальных рэчываў. Кіраўнік завода таксама адзначыў, што сёння ў населеным пункце Якімава Слабада праходзіць сустрэча прадстаўнікоў прадпрыемства і дзяржаўных органаў з насельніцтвам. Жыхарам даводзіцца ўся неабходная інфармацыя аб выніках даследаванняў паветра і вады паблізу населенага пункта і работах, якія праводзяцца на прадпрыемстве.

Старшыня канцэрна даручыў генеральнаму дырэктару трымаць сітуацыю на пастаянным кантролі і ў аператыўным парадку інфармаваць канцэрн.

Круг таксама паведаміў, што завод "функцыянуе ў перыядычным рэжыме з правядзеннем работ па настройцы і наладцы ўсіх сістэм і тэхналагічных працэсаў". Паказчыкі па белізне, парогах залому, разрыву палатна істотна палепшаны.

Ажыццёўлены першыя пастаўкі цэлюлозы на ўнутраны рынак. Прададзена 230 тон, на складзе ёсць запас у 1.750 тон. Вядуцца падрыхтоўчыя работы па рэалізацыі цэлюлозы на біржавых таргах у краіны СНД.

Раней у канцэрне заявілі, што захаванне экалагічных патрабаванняў пры правядзенні пробнай вытворчасці на заводзе сульфатнай беленай цэлюлозы "знаходзіцца пад строгім кантролем кіраўніцтва прадпрыемства і адпаведных службаў". Заборы паветра для кантролю ажыццяўляюцца кожныя чатыры гадзіны, і замеры не паказваюць перавышэння гранічна дапушчальных канцэнтрацый забруджвальных рэчываў.

Як паведамляў раней БелаПАН, у вёсцы Якімава Слабада пад Светлагорскам 25 снежня прайшоў стыхійны мітынг супраць завода беленай цэлюлозы, пабудаванага кітайцамі на базе цэлюлозна-кардоннага камбіната. Завод яшчэ не ўведзены ў эксплуатацыю, але нават яго праца ў тэставым рэжыме абурыла вяскоўцаў і жыхароў райцэнтра.

"Смурод стаіць такі, што немагчыма дыхаць. Людзі скардзяцца ў санстанцыю, экалогію і органы ўлады, але ім паўтараюць, што ўсё ў парадку. Цярпенне ўжо лопнула, і жыхары Якімавай Слабады 25 снежня сабраліся на мітынг", — паведаміла БелаПАН праваабаронца Алена Маслюкова, якая прысутнічала на сходзе вяскоўцаў. Грамадзяне абураліся, што суседства завода ператварыла іх вёску ў "даліну смерці", заяўлялі, што яны асцерагаюцца за жыцці дзяцей, што ў іх абвастраюцца хранічныя захворванні, да прыкладу астма. Асабліва людзей турбуе востры агідны хімічны пах, які распаўсюджваецца ад завода. На стыхійным мітынгу яны збіралі подпісы пад зваротамі да ўладаў — мясцовых і абласных, у экалагічныя службы, Генеральную пракуратуру і Адміністрацыю прэзідэнта. На смурод скардзяцца і жыхары Светлагорска.
Марына Носава, БелаПАН.

Аўтарызацыя

Імя:
Пароль:

Архіў

  • дзень
  • месяц
  • год

Сюжэты


© 2000 — 2019 БелаПАН. Усе правы абароненыя.
Уся інфармацыя, размешчаная на гэтым сайце, прызначана толькі для персанальнага выкарыстання і не падлягае далейшаму ўзнаўленню і/або распаўсюджванню ў любой форме інакш як з пісьмовага дазволу БелаПАН