Беларуская інфармацыйная кампанія
Адрас старонкі: https://by.belapan.by/archive/2018/02/01/940899_940900/
Дата раздрукоўкі: 16.10.2019 02:33
01.02.2018 15:19 Грамадства, Палітыка

Журналіста-фрылансера з Віцебскай вобласці Дзмітрыя Лупача аштрафавалі за супрацоўніцтва з "Белсатам"

Мінск, 1 лютага. Журналіст-фрылансер з Глыбокага Віцебскай вобласці Дзмітрый Лупач аштрафаваны за супрацоўніцтва з польскім тэлеканалам "Белсат", які вяшчае на Беларусь, без акрэдытацыі ў МЗС. Рашэннем суда Докшыцкага раёна журналіст аштрафаваны на 40 базавых велічынь (980 рублёў), паведамляе прэс-служба Беларускай асацыяцыі журналістаў.

Лупача судзілі за падрыхтоўку рэпартажу пра жыццё аднаго з аграгарадкоў раёна. Для журналіста гэта ўжо другі такі штраф у 2018 годзе.

Як паведамлялася, Беларуская асацыяцыя журналістаў і Беларускі Хельсінкскі камітэт 29 студзеня накіравалі ў Канстытуцыйны суд зварот з просьбай выказацца з нагоды прававой няпэўнасці, у выніку якой журналістаў-фрылансераў у Беларусі прыцягваюць да адказнасці па артыкуле 22.9 КоАП (парушэнне заканадаўства аб СМІ). У сумесным звароце дзвюх арганізацый прыводзяцца выпадкі, калі суды накладваюць штрафы на журналістаў як на фізічных асоб па гэтым артыкуле за супрацоўніцтва з замежнымі СМІ без акрэдытацыі. Пры гэтым згодна з дзейным законам "Аб сродках масавай інфармацыі" выраб прадукцыі СМІ з'яўляецца выключна прэрагатывай юрыдычнай асобы, на якую ўскладзены функцыі рэдакцыі.

Заяўнікі просяць Канстытуцыйны суд распачаць вытворчасць па справе аб ліквідацыі ў нарматыўных прававых актах прабелаў, выключэнні ў іх калізій і прававой няпэўнасці ў святле канстытуцыйных гарантый на свабоднае выказванне перакананняў (арт. 33 Канстытуцыі), права на атрыманне, захоўванне i распаўсюджванне дакладнай інфармацыі (арт. 34 Канстытуцыі). На думку БХК і БАЖ, Канстытуцыйны суд можа прыняць рашэнне, у якім былі б дакладна сфармуляваныя прапановы канкрэтным дзяржорганам і прэзідэнту аб неабходнасці змены заканадаўства па рэгуляванні дзейнасці СМІ і журналістаў.

Паводле звестак БАЖ, у 2017 годзе журналісты-фрылансеры 69 разоў прыцягваліся судамі да адказнасці за супрацоўніцтва з замежнымі СМІ без акрэдытацыі на падставе ч. 2 арт. 22.9 КоАП. Такая практыка працягваецца і ў гэтым годзе.
Аляксей Аляксандраў, БелаПАН.

Аўтарызацыя

Імя:
Пароль:

Архіў

  • дзень
  • месяц
  • год

Сюжэты


© 2000 — 2019 БелаПАН. Усе правы абароненыя.
Уся інфармацыя, размешчаная на гэтым сайце, прызначана толькі для персанальнага выкарыстання і не падлягае далейшаму ўзнаўленню і/або распаўсюджванню ў любой форме інакш як з пісьмовага дазволу БелаПАН