Беларуская інфармацыйная кампанія
Адрас старонкі: https://by.belapan.by/archive/2018/03/24/948535_870013/
Дата раздрукоўкі: 20.11.2018 23:44
24.03.2018 14:07 Палітыка, Грамадства

Зянон Пазняк: Абвяшчэнне БНР стала сімвалам перамогі беларускай нацыянальнай ідэі

Мінск, 24 сакавіка. Абвяшчэнне 100 гадоў таму Беларускай Народнай Рэспублікі стала сімвалам перамогі беларускай нацыянальнай ідэі, гаворыцца ў звароце старшыні Кансерватыўна-хрысціянскай партыі — БНФ Зянона Пазняка да ўдзельнікаў мітынгу і канцэрта, які праходзіць 24 сакавіка ў Кіеўскім скверы Мінска.
Пазняк знаходзіцца ў палітычнай эміграцыі з 1996 года. На думку яго прыхільнікаў у КХП-БНФ, вяртацца ў Беларусь яму па-ранейшаму небяспечна.

Зварот зачытаў адказны сакратар партыі Алесь Чахольскі. Пазняк павіншаваў беларусаў са святам 100-годдзя абвяшчэння БНР. "Гэта вельмі вялікая падзея ў развіцці нацыі. Абвяшчэнне незалежнасці — гэта сімвал перамогі нацыянальнай ідэі", — лічыць ён. Палітык адзначыў, што беларусы ва ўсе часы "змагаліся з акупантамі".

"Імкненне да свабоды ў нас было заўсёды. БНР з`явілася не на пустым месцы, а стала вынікам барацьбы з Масквой, — падкрэсліў ён. — Нягледзячы на пераслед, рэпрэсіі, генацыд, беларусы вярнуліся да сваіх каранёў, стварыўшы ўжо ў канцы XX стагоддзя незалежную дзяржаву".

Мерапрыемства, арганізаванае КХП-БНФ, працягнулася выступамі музыкаў і бардаў. У акцыі ўдзельнічаюць прыблізна 200 чалавек.

Паводле задумы арганізатараў мітынгу і канцэрта, сённяшнюю акцыю можна разглядаць як пачатак святкавання 100-годдзя БНР і пралог да ўрачыстага мітынгу і канцэрта, якія адбудуцца 25 сакавіка ля опернага тэатра ў Мінску і таксама санкцыянаваныя гарвыканкамам. Збор удзельнікаў плануецца з 13.00 да 14.00. Пасля мітынгу адбудзецца канцэрт, што будзе доўжыцца да 19.00.

Дзень Волі 25 сакавіка адзначае дэмакратычная грамадскасць Беларусі, афіцыйна гэтага свята ў краіне няма. Незалежнасць Беларускай Народнай Рэспублікі была абвешчаная ў ноч на 25 сакавіка 1918 года. Многія гісторыкі лічаць, што менавіта перыяд БНР стаў першым этапам дзяржаўнага станаўлення беларускай нацыі.
Сяргей Каралевіч, БелаПАН.

Аўтарызацыя

Імя:
Пароль:

Архіў

  • дзень
  • месяц
  • год

Сюжэты


© 2000 — 2018 БелаПАН. Усе правы абароненыя.
Уся інфармацыя, размешчаная на гэтым сайце, прызначана толькі для персанальнага выкарыстання і не падлягае далейшаму ўзнаўленню і/або распаўсюджванню ў любой форме інакш як з пісьмовага дазволу БелаПАН