Беларуская інфармацыйная кампанія
Адрас старонкі: https://by.belapan.by/archive/2018/03/25/948594_948595/
Дата раздрукоўкі: 27.05.2019 05:56
25.03.2018 10:11 Грамадства, Палітыка

Старшыня Рады БНР Івонка Сурвіла павіншавала суайчыннікаў з юбілеем БНР

Мінск, 25 сакавіка. Старшыня Рады БНР Івонка Сурвіла павіншавала суайчыннікаў з юбілеем абвяшчэння Беларускай Народнай Рэспублікі і заклікала іх быць годнымі ідэалаў 25 сакавіка.

У віншаванні, размешчаным на youtube, Сурвіла адзначыла, што сёння Беларусь святкуе не толькі юбілей тых слаўных падзей, калі беларускі народ "абвясціў свету, што скідае апошняе ярмо дзяржаўнай залежнасці, але і 100-годдзе змагання".

"Сёння, 100 год пасля абвяшчэння незалежнасці Беларускай Народнай Рэспублікі, Беларусь жыве і жывуць ідэалы 25 сакавіка. Шлях наш быў цярністым, але мы выжылі і не дазволі згаснуць нашай паходні надзеі <...>. Не было б БНР — не было б БССР і не было б незалежнай дзяржавы Беларусь", — перакананая Івонка Сурвіла.

Аднак ідэалы 25 сакавіка яшчэ не дасягнуты, дадала яна. "Беларускі дом яшчэ ўсё не зусім беларускі, і незалежнасць яго яшчэ ўсё пад пагрозай", — падкрэсліла старшыня Рады БНР. "Ці хопіць у нас вытрываласці, каб адбудоўваць яго, пакуль не адродзім назаўсёды жыццё рэспублікі сваёй? Ці перажытае прамыванне мазгоў чужой прапагандай дазволіць нашым людзям прызнаць, што былі яны анямелымі ахвярамі чужога захопніка? І ці зразумее народ, што будучыня ў яго руках і што ад яго залежыць, ці Беларусь станецца заможнай краінай Еўропы ці застанецца эксплуатаванай калоніяй нядобразычлівых вертыкалаў?" — сказала яна.

"Ідэалы 25 сакавіка жывуць і будуць жыць, але ад кожнага з нас залежыць, калі мы іх здзейснім. Дык давайце скарыстаем з гэтага вялікага юбілею, каб даказаць сабе і свету, што мы іх годныя. Жыве Беларусь!" — так завяршыла сваё віншаванне Сурвіла.

Урад і Рада Беларускай Народнай Рэспублікі, якая была абвешчана 25 сакавіка 1918 года, са студзеня 1919-га знаходзяцца ў выгнанні. Цяперашні старшыня Рады БНР Івонка Сурвіла жыве ў Канадзе.
БелаПАН.

Аўтарызацыя

Імя:
Пароль:

Архіў

  • дзень
  • месяц
  • год

Сюжэты


© 2000 — 2019 БелаПАН. Усе правы абароненыя.
Уся інфармацыя, размешчаная на гэтым сайце, прызначана толькі для персанальнага выкарыстання і не падлягае далейшаму ўзнаўленню і/або распаўсюджванню ў любой форме інакш як з пісьмовага дазволу БелаПАН