Беларуская інфармацыйная кампанія
Адрас старонкі: https://by.belapan.by/archive/2018/08/18/969217_856974/
Дата раздрукоўкі: 09.12.2019 11:44
18.08.2018 14:21 Палітыка, Грамадства

Лукашэнка: Ажыццяўляць дыктатуру ў Беларусі проста нерэальна

Мінск, 18 жніўня. Ажыццяўляць дыктатуру ў Беларусі проста нерэальна, заявіў Аляксандр Лукашэнка 18 жніўня, прызначаючы новае кіраўніцтва ўрада і міністэрстваў.

"Я ўжо казаў, што ўважліва сачу за рэакцыяй грамадства на мае рашэнні. Ды і ў мяне ўжо даўно выпрацавалася звычка з першых дзён арыентавацца на тое, якога меркавання людзі аб тым курсе, што праводзіцца ў краіне", — цытуе прэзідэнта яго прэс-служба.

Лукашэнка адзначыў, што, натуральна, меркаванні ёсць розныя. "Мы жывем у дэмакратычнай краіне. Прытым заціснутыя двума дэмакратычнымі блокамі з захаду і з усходу. На поўдні ў нас наогул дэмакратыя далей няма куды. І здзяйсняць нейкую дыктатуру ў Беларусі — гэта проста нерэальна. І тыя, хто падобнае заяўляе, — гэта смешна. Але парадак у краіне заўсёды быў, і ён будзе", — заявіў ён.

"На парадку дня гэтыя пытанні стаяць даўно. Прынамсі перада мной як прэзідэнтам. А апошнім часам яны набылі асаблівае гучанне ў сувязі з мерапрыемствам на ўсходзе Беларусі. Тады мной было прынятае рашэнне абнавіць наш урад, асабліва кіраўніцтва. Было даручана кіраўніку адміністрацыі правесці кансультацыі з адпаведнымі службовымі асобамі, вярнуцца да рэзерву кадраў прэзідэнта, правесці кансультацыі з кіраўнікамі арганізацый грамадзянскай супольнасці нашай краіны", — нагадаў кіраўнік дзяржавы.

"Вы выдатна ведаеце, што такое грамадзянская супольнасць у Беларусі. Гэта не тыя, хто ходзіць па плошчах і балбоча. Гэта кіраўнікі нашай жаночай арганізацыі, маладзёжнай арганізацыі, прафсаюзаў і ветэранскай арганізацыі... Як мяне праінфармавалі, такія кансультацыі былі праведзеныя. І тыя кандыдатуры, якія абмяркоўваліся з кадравага рэестра, паводле маёй інфармацыі, былі падтрыманыя і ўхваленыя", — адзначыў Лукашэнка.

Аляксандр Лукашэнка 18 жніўня змяніў кіраўніцтва ўрада: замест Андрэя Кабякова прэм'ер-міністрам Беларусі прызначаны Сяргей Румас, які да цяперашняга часу ўзначальваў Банк развіцця. Акрамя таго, прызначаны шэраг новых міністраў, а таксама старшыня Дзяржаўнага ваенна-прамысловага камітэта.
Аляксей Арэшка, БелаПАН.

Аўтарызацыя

Імя:
Пароль:

Архіў

  • дзень
  • месяц
  • год

Сюжэты


© 2000 — 2019 БелаПАН. Усе правы абароненыя.
Уся інфармацыя, размешчаная на гэтым сайце, прызначана толькі для персанальнага выкарыстання і не падлягае далейшаму ўзнаўленню і/або распаўсюджванню ў любой форме інакш як з пісьмовага дазволу БелаПАН