Беларуская інфармацыйная кампанія
Адрас старонкі: https://by.belapan.by/archive/2018/08/29/970623_970634/
Дата раздрукоўкі: 15.06.2021 16:50
29.08.2018 15:53 Грамадства

Прадстаўнік Міністэрства аховы здароўя: Верагоднай прычынай смерці дзіцяці пасля планавай вакцынацыі стала анафілаксія (дапоўнена)

Мінск, 29 жніўня. Верагоднай прычынай смерці двухмесячнага хлопчыка, які памёр 13 жніўня ў Ганцавіцкім раёне пасля планавай вакцынацыі, стала анафілактычная рэакцыя на адэкватна ўведзены прэпарат. Пра гэта заявіла на брыфінгу 29 жніўня ў Мінску начальнік аддзела медыцынскай дапамогі маці і дзецям галоўнага ўпраўлення арганізацыі медыцынскай дапамогі і экспертызы Міністэрства аховы здароўя Беларусі Людміла Лёгкая.
Па факце гібелі дзіцяці, адзначыла яна, міністэрства стварыла камісію, правяло ацэнку якасці аказання медыцынскай дапамогі. Выпадак быў разгледжаны на лячэбна-кантрольным савеце Міністэрства аховы здароўя. "Камісія прыйшла да высновы, што верагоднай прычынай крытычнага стану, які прывёў да смерці дзіцяці, з`явілася анафілаксія, якая развілася з прычыны паталагічнай рэакцыі на адэкватна прызначаны і правільна ўведзены лекавы сродак — вакцыну. Што патрабуе дадатковага ўдакладнення пасля атрымання вынікаў судова-медыцынскай экспертызы", — сказала Лёгкая.

Яна падкрэсліла, што развіццё паталагічнага працэсу, які прывёў да крытычнага стану, было непрадказальным. "Смяротны зыход у сувязі з маланкавым цячэннем паталагічнага працэсу было немагчыма прадухіліць", — заявіла прадстаўнік Міністэрства аховы здароўя.

Паводле слоў Лёгкай, аб`ём і парадак аказання экстранай медыцынскай дапамогі дзіцяці на ўсіх этапах адпавядаў цяжару яго стану, выстаўленаму дыягназу і ажыццяўляўся ў адпаведнасці з нарматыўнымі прававымі актамі Міністэрства аховы здароўя.

Камісія не ўстанавіла парушэнняў тэмпературнага рэжыму пры транспартаванні і захоўванні вакцын названых серый, якія маглі паўплываць на іх якасць, дадала яна. "Па выніках расследавання сітуацыі фактаў, якія б ускосна і прама пацвярджалі парушэнне тэхнікі ўвядзення вакцын і выканання санітарна-супрацьэпідэмічных патрабаванняў, выяўлена не было. Працягваецца праца іншых кампетэнтных органаў па расследаванні факта смерці дзіцяці", — сказала прадстаўнік Міністэрства аховы здароўя.

Пры гэтым Лёгкая адзначыла, што на ўвядзенне вакцын і любых лекавых сродкаў могуць быць розныя рэакцыі. Поствакцынальныя рэакцыі ўяўляюць сабой розныя змены стану дзіцяці і праходзяць самастойна на працягу невялікага прамежку часу. Як правіла, яны не ўяўляюць пагрозы, могуць быць мясцовымі і агульнымі і дзеляцца на слабыя і моцныя. Пасля моцных поствакцынальных рэакцый урач пры неабходнасці сумесна са спецыялістамі або на імуналагічнай камісіі вырашае пытанне па арганізацыі індывідуальнай вакцынацыі.

Поствакцынальныя ўскладненні — гэта ўстойлівыя змены ў арганізме чалавека, якому робяць прышчэпку, што адбыліся пасля прышчэпкі. У гэтым выпадку парушэнні працяглыя, значна выходзяць за рамкі фізіялагічнай нормы і маюць вынікам разнастайныя парушэнні здароўя. У колькасным выражэнні ўскладненні ўзнікаюць у адным выпадку на некалькі сотняў доз: ад аднаго выпадку на 50 тыс. да аднаго на 1 млн доз, патлумачыла Лёгкая.

"Частата развіцця ўскладнення на ўвядзенне вакцыны супраць коклюшу, дыфтэрыі, слупняка складае ад аднаго выпадку на 750—800 тысяч доз. На жаль, ні адна з вакцын не з`яўляецца абсалютна бяспечнай, — падкрэсліла прадстаўнік Міністэрства аховы здароўя. — Заўсёды ўскладненні пасля прышчэпак — гэта вельмі сур`ёзна, і яны разглядаюцца як надзвычайная сітуацыя. Кожны такі выпадак падрабязна аналізуецца. Медыцынская камісія, у якую ўваходзяць розныя спецыялісты, вырашае, чаму так адбылося і што рабіць далей".

Трагедыя здарылася 13 жніўня ў Ганцавіцкім раёне Брэсцкай вобласці. Бацькі двухмесячнага хлопчыка даставілі яго ў фельчарска-акушэрскі пункт на планавую вакцынацыю. Пасля ўвядзення некалькіх прышчэпак дзіця пачало задыхацца. Брыгада хуткай дапамогі даставіла хлопчыка ў Ганцавіцкую цэнтральную раённую бальніцу, але выратаваць дзіця не ўдалося. Ганцавіцкі раённы аддзел Следчага камітэта ініцыяваў праверку па факце смерці дзіцяці. Былі прызначаны экспертныя даследаванні канфіскаваных медыцынскіх дакументаў і прэпаратаў, у прыватнасці дзвюх вакцын, якія ўвялі дзіцяці, — "Эупента" (LG Chem, Паўднёвая Карэя) і "Імавакс Полія" (Sanofi Pasteur, Францыя). Прымяненне дзвюх серый вакцын "Эупента" і "Імавакс Полія" ў Беларусі прыпынена да завяршэння расследавання.
Ірына Турчына, БелаПАН.

Аўтарызацыя

Імя:
Пароль:

Архіў

  • дзень
  • месяц
  • год

Сюжэты




© 2000 — 2021 БелаПАН. Усе правы абароненыя.
Уся інфармацыя, размешчаная на гэтым сайце, прызначана толькі для персанальнага выкарыстання і не падлягае далейшаму ўзнаўленню і/або распаўсюджванню ў любой форме інакш як з пісьмовага дазволу БелаПАН

.239