Беларуская інфармацыйная кампанія
Адрас старонкі: https://by.belapan.by/archive/2018/09/14/972840_972841/
Дата раздрукоўкі: 20.11.2018 16:36
14.09.2018 18:15 Спорт

"МАЗ" Сяргея Вязовіча паказаў першы час на чацвёртым этапе ралі-рэйду Turkmen Desert Race

Мінск, 14 верасня. Гоначны грузавік "МАЗ" Сяргея Вязовіча беларускай каманды "МАЗ-СПОРТаўта" паказаў першы час на чацвёртым этапе ралі-рэйду Turkmen Desert Race, які праходзіць па пустыні Каракумы. Яшчэ два беларускія экіпажы ўвайшлі ў першую пяцёрку, паведамілі ў прэс-службе ААТ "МАЗ".

Чацвёрты спецучастак працягласцю 245 км уключаў як хуткасныя ўчасткі ўздоўж возера, так і бездараж са складанай навігацыяй. Беларускія экіпажы справіліся з выпрабаваннямі без якіх-небудзь складанасцяў.

Сяргей Вязовіч упэўнена праехаў спецучастак, пакінуўшы за сабой усе астатнія экіпажы. Найбліжэйшы праследавацель, расіянін Айрат Мардзееў, адстаў ад беларусаў амаль на 6 хвілін. Трэцім прыйшоў яго калега па камандзе "КАМАЗ-майстар" Дзмітрый Сотнікаў, які прайграў больш за 15 хвілін.

У генеральнай класіфікацыі самы хуткі "МАЗ" знаходзіцца на другім месцы і скарачае адставанне — на апошнім этапе для тытула чэмпіёна яму трэба адыграць каля 5 хвілін.

"МАЗ" Аляксандра Васілеўскага фінішаваў чацвёртым з адставаннем у 15 хвілін. У агульным заліку экіпаж знаходзіцца на пятай пазіцыі, прайграючы лідару гонкі 68 хвілін.

Экіпаж Аляксея Вішнеўскага заняў пятае месца. Ад лепшага выніку яго аддзялялі 25 хвілін. У генеральнай класіфікацыі мазаўскі экіпаж захоўвае чацвёрты радок з адставаннем амаль у 52 хвіліны.

Ралі-рэйд Turkmen Desert Race праходзіць з 11 па 15 верасня. Яго маршрут звязвае старажытны горад Амуль (цяпер Туркменабад) і прыбярэжны Хазар каля Каспійскага мора. Працягласць трасы складае 1.614 км, з іх 1.203 км прыпадаюць на спецучасткі. Гоншчыкі едуць па пустыні Каракумы з яе пяскамі і вялікімі барханамі.
Аляксей Арэшка, БелаПАН.

Аўтарызацыя

Імя:
Пароль:

Архіў

  • дзень
  • месяц
  • год

Сюжэты


© 2000 — 2018 БелаПАН. Усе правы абароненыя.
Уся інфармацыя, размешчаная на гэтым сайце, прызначана толькі для персанальнага выкарыстання і не падлягае далейшаму ўзнаўленню і/або распаўсюджванню ў любой форме інакш як з пісьмовага дазволу БелаПАН