Беларуская інфармацыйная кампанія
Адрас старонкі: https://by.belapan.by/archive/2018/10/11/976388_12345/
Дата раздрукоўкі: 13.12.2018 00:26
11.10.2018 09:25 Палітыка, Грамадства

Праваабаронца Стэфановіч з трыбуны ПАСЕ заклікаў увесці мараторый на смяротнае пакаранне ў Беларусі

Мінск, 11 кастрычніка. Увесці мараторый на смяротнае пакаранне ў Беларусі заклікаў намеснік старшыні закрытага ўладамі краіны праваабарончага цэнтра "Вясна" Валянцін Стэфановіч. 10 кастрычніка ён выступіў на пасяджэнні камітэта па прававых пытаннях і правах чалавека Парламенцкай асамблеі Савета Еўропы ў Страсбургу.

Акрамя Стэфановіча ў дыскусіі прыняў удзел старшыня камісіі па міжнародных справах Палаты прадстаўнікоў Нацыянальнага сходу Валерый Варанецкі, паведамляе spring96.org.

Кіраўнік парламенцкай камісіі "традыцыйна адзначыў складанасць пытання з адменай смяротнага пакарання, казаў, што Беларусь прыйдзе да яго адмены паступова". Варанецкі нагадаў аб выніках рэферэндуму 1996 года, калі большасць грамадзян (82%) выказалася за захаванне смяротнага пакарання, спаслаўся на паступовае змяненне грамадскай думкі, адзначыўшы, што 52% грамадзян выказваюцца за смяротнае пакаранне.

Валянцін Стэфановіч даў інфармацыю аб апошніх смяротных прысудах, якія былі вынесеныя ў студзені гэтага года, і аб прывядзенні ў выкананне прысудаў у маі, спыніўся на некаторых праблемных момантах: абстаноўка сакрэтнасці, нявыдача целаў расстраляных сваякам, праблема выканання смяротных прысудаў Вярхоўным судом, якія немагчыма абскардзіць у парадку апеляцыі, хуткае прывядзенне прысуду ў выкананне — у сярэднім на працягу года, а то і за тры месяцы.

"У гэты Сусветны дзень супраць смяротнага пакарання я як грамадзянін Беларусі асабіста і як прадстаўнік грамадзянскай супольнасці заклікаю ў чарговы раз улады Беларусі да ўвядзення мараторыя на смяротнае пакаранне, бо гэта ў першую чаргу адпавядае інтарэсам нашага беларускага грамадства", — завяршыў свой выступ Стэфановіч.

На пасяджэнні Камітэта былі прадстаўленыя апошнія сумесныя даклады праваабаронцаў "Вясны" і Міжнароднай федэрацыі за правы чалавека (FIDH) "Смяротнае пакаранне ў Беларусі: забойствы на (не)законных падставах" і "Беларусь: кантроль над адвакатамі — пагроза правам чалавека".

Паводле дадзеных камітэта па прававых пытаннях і правах чалавека Парламенцкай асамблеі Савета Еўропы, летась у выкананне было прыведзена больш за 1.000 смяротных прысудаў у 23 краінах свету. Лідзіруюць у гэтым спісе Кітай, Іран, Ірак, Сірыя, Пакістан.
БелаПАН.

Аўтарызацыя

Імя:
Пароль:

Архіў

  • дзень
  • месяц
  • год

Сюжэты


© 2000 — 2018 БелаПАН. Усе правы абароненыя.
Уся інфармацыя, размешчаная на гэтым сайце, прызначана толькі для персанальнага выкарыстання і не падлягае далейшаму ўзнаўленню і/або распаўсюджванню ў любой форме інакш як з пісьмовага дазволу БелаПАН