Беларуская інфармацыйная кампанія
Адрас старонкі: https://by.belapan.by/archive/2018/11/16/981476_981477/
Дата раздрукоўкі: 28.05.2020 15:42
16.11.2018 19:35 Эканоміка, Спорт

Грузавікі каманды "МАЗ-СПОРТаўта" адправіліся ў Перу для ўдзелу ў ралі "Дакар-2019"

Мінск, 16 лістапада. Тры экіпажы каманды "МАЗ-СПОРТаўта" возьмуць удзел у сусветна вядомым ралі-рэйдзе "Дакар", які пройдзе з 6 па 17 студзеня ў Перу. Спартыўныя грузавікі і аўтамабілі тэхнічнай падтрымкі выехалі з Мінска і накіраваліся ў французскі порт Гаўр, адкуль паплывуць на пароме да берагоў Паўднёвай Амерыкі, расказалі ў ААТ "МАЗ".

Марафон "Дакар-2019" пройдзе толькі на тэрыторыі Перу. Стартуе гонка 6 студзеня ў Ліме, а завершыцца там жа праз 11 дзён. Гоншчыкам трэба будзе праехаць каля 5 тыс. км. Больш за палову маршруту пралягае праз вялізныя дзюны і іншыя пясчаныя перашкоды. У той жа час, у адрозненне ад папярэдніх гадоў, экіпажы не сутыкнуцца з высакагор'ем.

На гонку беларускія аўтамабілі прыедуць у порт сваім ходам, а 22 лістапада іх пагрузяць на паром. Да Паўднёвай Амерыкі яны дабяруцца ў канцы снежня. Каманда зможа забраць аўтамабілі 3 студзеня, пасля чаго застанецца два дні на тэхнічныя праверкі і падрыхтоўку да ралі.

Склад экіпажаў не памяняўся. Сяргей Вязовіч паедзе разам са штурманам Паўлам Гараніным і механікам Андрэем Жыгуліным. Пілоту Аляксею Вішнеўскаму дапамогуць штурман Максім Новікаў і механік Андрэй Невяровіч. У трэцім экіпажы будуць пілот Аляксандр Васілеўскі, штурман Дзмітрый Віхрэнка і механік Антон Запарошчанка.

Як паведамілі на Мінскім аўтазаводзе, беларускія гоншчыкі нацэлены на прызавыя месцы. Пасля другога месца на мінулым "Дакары" і чэмпіёнскага тытула на Turkmen Desert Race ад іх чакаюць высокіх вынікаў.

"Вядома, будзем ехаць на максімальны вынік, каб добра прадставіць краіну і магчымасці Мінскага аўтазавода. Але "Дакар" — гэта складаная і непрадказальная гонка, у якой сітуацыя можа кардынальна змяніцца на любым этапе. Хоць нашы гоншчыкі, як і тэхніка, гатовыя да любых выпрабаванняў. І апошняя гонка ў Туркменістане гэта выдатна прадэманстравала", — адзначылі ў камандзе "МАЗ-СПОРТаўта".

Як падкрэсліваюць на МАЗе, ралі "Дакар" — гэта не толькі спаборніцтва, але і пляцоўка для экстрым-тэста спартыўных грузавікоў, якія шмат у чым складаюцца з серыйных камплектуючых. Правераныя ноу-хау потым знаходзяць прымяненне ў канвеернай вытворчасці. Пры гэтым многія часткі спартыўных аўтамабіляў, у тым ліку кабіна, рама, надбудовы кузава і кранштэйны, вырабленыя ў Беларусі.
Аляксей Арэшка, БелаПАН.

Аўтарызацыя

Імя:
Пароль:

Архіў

  • дзень
  • месяц
  • год

Сюжэты


© 2000 — 2020 БелаПАН. Усе правы абароненыя.
Уся інфармацыя, размешчаная на гэтым сайце, прызначана толькі для персанальнага выкарыстання і не падлягае далейшаму ўзнаўленню і/або распаўсюджванню ў любой форме інакш як з пісьмовага дазволу БелаПАН

.239