Беларуская інфармацыйная кампанія
Адрас старонкі: https://by.belapan.by/archive/2018/12/05/983840_983841/
Дата раздрукоўкі: 18.09.2020 14:19
05.12.2018 12:41 Палітыка, Эканоміка

Лукашэнка ў Санкт-Пецярбургу прыме ўдзел у саміце ЕАЭС і нефармальнай сустрэчы кіраўнікоў дзяржаў СНД

Мінск, 5 снежня. Аляксандр Лукашэнка 6 снежня наведае Санкт-Пецярбург для ўдзелу ў пасяджэнні Вышэйшага Еўразійскага эканамічнага савета і нефармальнай сустрэчы кіраўнікоў дзяржаў СНД, паведамляе прэс-служба прэзідэнта Беларусі.

Нагадаем, запланаваны таксама ў Санкт-Пецярбургу саміт АДКБ адменены па просьбе Арменіі, у якой 9 снежня пройдуць датэрміновыя парламенцкія выбары.

Перамовы лідараў краін ЕАЭС, гаворыцца ў паведамленні прэс-службы прэзідэнта, пройдуць у вузкім і пашыраным складах. Кіраўнікі дзяржаў абмяркуюць далейшае развіццё інтэграцыйных працэсаў, рэалізацыю лічбавага парадку дня арганізацыі, фарміраванне агульных рынкаў газу, нафты і нафтапрадуктаў. Акрамя таго, у парадак дня ўключаны пытанні, якія тычацца асноўных кірункаў міжнароднай дзейнасці ЕАЭС, канкурэнцыі на трансгранічных рынках, супрацоўніцтва ў сферы прадастаўлення касмічных і геаінфармацыйных паслуг.

У гэты ж дзень Лукашэнка прыме ўдзел у нефармальнай сустрэчы кіраўнікоў дзяржаў — удзельніц СНД. "Лідары краін падвядуць вынікі супрацоўніцтва ў гэтым годзе, абмяркуюць выкананне дасягнутых раней дамоўленасцяў і далейшае развіццё ўзаемадзеяння ў фармаце Садружнасці", — паведамляе прэс-служба.

Папярэднія нефармальныя саміты СНД праходзілі ў Маскве 26 снежня 2017 года і 8 мая 2015 года.
Андрэй Серада, БелаПАН.

Аўтарызацыя

Імя:
Пароль:

Архіў

  • дзень
  • месяц
  • год

Сюжэты


© 2000 — 2020 БелаПАН. Усе правы абароненыя.
Уся інфармацыя, размешчаная на гэтым сайце, прызначана толькі для персанальнага выкарыстання і не падлягае далейшаму ўзнаўленню і/або распаўсюджванню ў любой форме інакш як з пісьмовага дазволу БелаПАН

.239