Беларуская інфармацыйная кампанія
Адрас старонкі: https://by.belapan.by/archive/2018/12/06/984118_123456/
Дата раздрукоўкі: 19.12.2018 15:23
06.12.2018 21:44 Эканоміка, Грамадства, Фінансы

Нацбанк Беларусі у 2019 годзе выпусціць у абарачэнне 14 найменняў памятных манет

Мінск, 6 снежня. Пастановай праўлення Нацыянальнага банка ад 3 снежня зацверджаны пералік памятных манет, якія з'яўляюцца законным плацежным сродкам Беларусі, што плануюцца да выпуску ў абарачэнне ў 2019 годзе.

Як паведамляе прэс-служба Нацбанка, традыцыйна папулярныя ў Беларусі і за мяжой манеты спартыўнай тэматыкі. Спецыяльна да II Еўрапейскіх гульняў Нацбанк выпусціць памятныя манеты "II Еўрапейскія гульні 2019 года. Мінск". Улічваючы дасягненні беларускіх майстроў вялікага тэніса, таксама будуць выпушчаныя ў абарачэнне памятныя манеты "Летнія віды спорту. Тэніс".

Стала ўжо традыцыяй выпускаць памятныя манеты, прысвечаныя птушцы года, якую вызначае грамадскае аб'яднанне "Ахова птушак Бацькаўшчыны". У 2019 годзе такой птушкай абраны вялікі арлец. Манета "Вялікі арлец" стане 13-тай у рамках серыі памятных манет "Птушка года". Выпуск памятных манет прыродаахоўнай тэматыкі будзе таксама прадоўжаны выхадам у свет памятных манет "Заказнік" Званец" у рамках серыі "Заказнікі Беларусі".

Да юбілейных дат будзе прымеркаваны выпуск памятных манет, прысвечаных 75-й гадавіне вызвалення Беларусі ад нямецка-фашысцкіх захопнікаў, 100-годдзю органаў юстыцыі Беларусі, 200-годдзю з дня нараджэння кампазітара Станіслава Манюшкі і 1.000-годдзю заснавання Брэста. Да 5-годдзя Еўразійскага эканамічнага саюза Нацыянальны банк Беларусі выпусціць у абарачэнне памятныя манеты "Еўразійскі эканамічны Саюз. 5 год".

Тэматыка гісторыка-культурных каштоўнасцяў будзе прадоўжана памятнымі манетамі "Разьба па дрэве" серыі "Народныя промыслы І рамёствы беларусаў", а таксама чарговымі памятнымі манетамі серыі "Архітэктурная спадчына Беларусі".

Паводле кітайскага календара, 2020 год — год Пацука. У працяг серыі "Кітайскі каляндар" у 2019 годзе будзе выпушчана памятная манета "Год Пацука".

Сегмент памятных манет, якія ўяўляюць цікавасць не толькі для калекцыянераў, але і з'яўляюцца добрым падарункам, плануецца дапоўніць памятнай манетай "Дзень анёла", прысвечанай імянінам.У 2019 годзе завершыцца выпуск памятных манет "Свет вачыма дзяцей".
Аляксей Арэшка, БелаПАН.

Аўтарызацыя

Імя:
Пароль:

Архіў

  • дзень
  • месяц
  • год

Сюжэты


© 2000 — 2018 БелаПАН. Усе правы абароненыя.
Уся інфармацыя, размешчаная на гэтым сайце, прызначана толькі для персанальнага выкарыстання і не падлягае далейшаму ўзнаўленню і/або распаўсюджванню ў любой форме інакш як з пісьмовага дазволу БелаПАН