Беларуская інфармацыйная кампанія
Адрас старонкі: https://by.belapan.by/archive/2018/12/20/985875_12345/
Дата раздрукоўкі: 24.09.2020 00:52
20.12.2018 13:20 Грамадства, Эканоміка

Лукашэнка: Устаноўлены парог у 2 млн чалавек у Мінску пераступіць нельга

Мінск, 20 снежня. Усталяваны парог у 2 млн чалавек у Мінску "пераступіць нельга", заявіў Аляксандр Лукашэнка 20 снежня на нарадзе з прадстаўнікамі Мінгарвыканкама і Мінгарсавета.

"Гэта не капрыз, а ўмова камфортнага жыцця людзей, — падкрэсліў ён. — Шчыльнасць насельніцтва ў Мінску і так вышэйшая, чым у Варшаве, Берліне, Кіеве, Рызе, Вільнюсе і іншых сталіцах. Праблему перанасялення можна вырашыць толькі ў звязцы з пытаннямі эканамічнага развіцця горада".

Як паведамляе прэс-служба прэзідэнта, Лукашэнка звярнуў увагу на асаблівы статус Мінска, які з'яўляецца палітычным, эканамічным, культурным цэнтрам краіны, найважнейшым транспартным вузлом. Тут пражывае пятая частка насельніцтва Беларусі — амаль 2 млн чалавек, а па асноўных паказчыках сацыяльна-эканамічнага развіцця Мінску належыць ад чвэрці (валавы ўнутраны прадукт) да 80% (прамыя замежныя інвестыцыі) агульнарэспубліканскіх значэнняў.

"Калі да сярэдзіны 2000-х мы аднаўлялі горад пасля развалу СССР, то затым Мінск выйшаў на сваю траекторыю развіцця, — адзначыў кіраўнік дзяржавы. — За дзве з паловай пяцігодкі насельніцтва прырастае па 16-17 тыс. чалавек за год, і па колькасці мы практычна дасягнулі разумную мяжу. Я не аднойчы пра гэта казаў. Было сказана дакладна і пэўна: хопіць, такімі тэмпамі Мінск развівацца ў плане насельніцтва не можа".

Паводле слоў Лукашэнкі, за восем гадоў эканоміка горада прырасла крыху больш чым на 20%, аднак гэта не можа быць падставай для гонару. "З аднаго боку, валавы рэгіянальны прадукт сталіцы на 70% фарміруецца ў сферы паслуг, гандлі і фінансах. З іншага — ён пакуль яшчэ рэсурсаёмісты, а прамысловыя прадпрыемствы адстаюць ад патрабаванняў сучаснага рынку і экалагічных нормаў. Сярэдні паказчык рэнтабельнасці не здольны дасягнуць двухзначнай лічбы і вагаецца каля яе", — сказаў ён.

Кіраўнік дзяржавы таксама заявіў пра неабходнасць распрацаваць і заканадаўча замацаваць планы па развіцці прыгарадных земляў сталіцы. У гэтых планах варта вызначыць функцыянальнае прызначэнне тэрыторый з добрым занаваннем і ўлікам інтэнсіўнасці іх выкарыстання. Паводле слоў Лукашэнкі, варта ўвязаць планы развіцця дзвюх адміністрацыйных адзінак, горада і вобласці. "Пакуль у дадзеным пытанні шмат бессістэмнасці і, я б нават сказаў, хаатычнасці", — адзначыў ён.

"Гаворачы пра эканоміку, як правіла, я выкарыстоўваю тэрмін "апераджальнае развіццё". Бо тут усё, як у спорце: калі бяжыш павольней, чым іншыя, значыць, адстанеш. Такі ж вобраз выкарыстоўваецца і ў дачыненні і да развіцця Мінска ў параўнанні з іншымі буйнымі гарадамі свету", — дадаў Лукашэнка.

Ірына Турчына, БелаПАН.

Аўтарызацыя

Імя:
Пароль:

Архіў

  • дзень
  • месяц
  • год

Сюжэты


© 2000 — 2020 БелаПАН. Усе правы абароненыя.
Уся інфармацыя, размешчаная на гэтым сайце, прызначана толькі для персанальнага выкарыстання і не падлягае далейшаму ўзнаўленню і/або распаўсюджванню ў любой форме інакш як з пісьмовага дазволу БелаПАН

.239