Беларуская інфармацыйная кампанія
Адрас старонкі: https://by.belapan.by/archive/2018/12/20/985988_12345/
Дата раздрукоўкі: 26.01.2021 03:01
20.12.2018 17:53 Грамадства

У Мінску ўпершыню падпісаная Стратэгія незалежнага медыясектара Беларусі

Мінск, 20 снежня. У Мінску 20 снежня ўпершыню падпісаная Стратэгія незалежнага медыясектара Рэспублікі Беларусь. Дакумент падпісалі каля 40 журналістаў і медыяэкспертаў.

Дакумент распрацаваны грамадскім аб`яднаннем "Беларуская асацыяцыя журналістаў" (БАЖ). Ён рыхтаваўся два гады па выніках сустрэч, у якіх узялі ўдзел больш за 80 чалавек — прадстаўнікі БАЖ, Асацыяцыі выдаўцоў рэгіянальнай прэсы "Аб`яднаныя масмедыя", фонду "Масавыя камунікацыі", нацыянальныя і рэгіянальныя СМІ, медыяэксперты.

Стратэгія разлічаная на 2019—2024 гады. Яе мэта — згуртаваць незалежныя беларускія медыя для супрацьстаяння сучасным выклікам на інфармацыйным рынку Беларусі.

Сярод асноўных выклікаў у дакуменце названыя: палітычны націск, абмежаванне свабоды слова і дзейнасці, недахоп фінансавання, уцечка кадраў, пераход аўдыторыі ў інтэрнэт, сацсеткі і месэнджары, слабая кааперацыя, негатыўны ўплыў канкурэнцыі за абмежаваныя рэсурсы (фінансавыя, чалавечыя і інш.), уплыў расійскіх медыя і прапаганды на беларускі медыярынак і беларускую аўдыторыю, парушэнне аўтарскіх правоў СМІ і інш.

Стратэгія вызначае пяць прыярытэтных напрамкаў дзейнасці незалежнага медыясектара краіны:

- пераадоленне прававых і палітычных абмежаванняў свабоды слова;

- умацаванне фінансавай устойлівасці незалежнага медыясектару;

- умацаванне кадравага патэнцыялу СМІ і павышэнне кваліфікацыі журналістаў;

- адаптацыя незалежных медыя да зменаў у спажыванні інфармацыі;

- развіццё самарэгулявання ў сферы аўтарскага права.

Як адзначыў у каментары БелаПАН старшыня БАЖ Андрэй Бастунец, прыняцце стратэгіі "ў нейкай ступені выкліканае неабходнасцю для медыясектара самавызначыцца, назваць каштоўнасныя падыходы, якія яго аб`ядноўваюць".

"З іншага боку, — дадаў Бастунец, — гэтая стратэгія можа стаць стымулам для ўзмацнення супрацоўніцтва ў медыясектары з мэтай распрацоўкі сумесных праграм і тактычных планаў, напрыклад, у галіне захавання аўтарскіх правоў у СМІ, або ў сувязі са зменай медыяспажывання і тым, як гэта ўплывае на рынак інфармацыі".

Тэкст Стратэгіі незалежнага медыясектару Беларусі размешчаны ў адкрытым доступе на сайце БАЖ.

Ірына Турчына, БелаПАН.

Аўтарызацыя

Імя:
Пароль:

Архіў

  • дзень
  • месяц
  • год

Сюжэты




© 2000 — 2021 БелаПАН. Усе правы абароненыя.
Уся інфармацыя, размешчаная на гэтым сайце, прызначана толькі для персанальнага выкарыстання і не падлягае далейшаму ўзнаўленню і/або распаўсюджванню ў любой форме інакш як з пісьмовага дазволу БелаПАН

.239