Беларуская інфармацыйная кампанія
Адрас старонкі: https://by.belapan.by/archive/2018/12/24/986367_123456/
Дата раздрукоўкі: 11.12.2019 23:40
24.12.2018 15:32 Эканоміка

Лукашэнка: Страты Беларусі ад расійскага падатковага манеўру складуць 15 млрд долараў

Мінск, 24 снежня. Страты Беларусі ад расійскага падатковага манеўру складуць 15 млрд долараў. Такая выснова вынікае з лічбаў, названых Аляксандрам Лукашэнкам 24 снежня ў Мінску на нарадзе па актуальных пытаннях супрацоўніцтва з РФ. Яна адбылася напярэдадні візіту афіцыйнага лідара ў Маскву, дзе пройдуць перамовы з прэзідэнтам Расіі Уладзімірам Пуціным.

Паводле слоў Лукашэнкі, якія прыводзіць яго прэс-служба, у красавіку 2017 года на перамовах у Санкт-Пецярбургу бакі дамовіліся вырашыць шэраг пытанняў у нафтагазавай сферы. "У сярэдзіне гэтага года мы павінны былі пачаць і скончыць да канца года пытанні па цэнах на газ (мы ў Піцеры дамаўляліся з Уладзімірам Уладзіміравічам), вырашыць пытанні нафтавыя ў сувязі з падатковым манеўрам у Расійскай Федэрацыі. Аднак на ўсе нашы прапановы Расія не пайшла, і гэтыя тэрміны фактычна сарваныя. І наша частка дэлегацыі заўтра на перамовах, і расійская павінны будуць адказаць на пытанне, чаму прынятае двума прэзідэнтамі рашэнне не было выканана ў гэтым годзе", — сказаў Лукашэнка.

Маючыя адбыцца перамовы ў Маскве ён назваў няпростымі. Напярэдадні перамоў ён прапанаваў абмеркаваць далейшы рух у вырашэнні інтэграцыйных пытанняў, непахісна паважаючы суверэнітэт дзвюх краін і асабліва выбар народаў.

Лукашэнка адзначыў, што па газе на наступны год цэны ўрэгуляваны: "Няхай гэта ў два разы даражэй, чым у Расіі. Але вось ужо тры гады запар, уключаючы 2019-ты, мы дамовіліся аб цэнаўтварэнні".

"Што да цэн на нафту, сітуацыя змянілася тры гады таму. На працягу гэтых трох гадоў з-за падатковага манеўру мы страцілі амаль 4,5 млрд долараў. Мы разумеем, што ў найбліжэйшыя гады, прыкладна да 2024 года, панясём стратаў яшчэ на 10,5 млрд", — заявіў беларускі кіраўнік.

"І мне асабіста, і ўрад гэта не адмаўляў, было жорстка абяцана: "Мы (Расія. — заўв. прэс-службы.) ніколі не пойдзем на пагаршэнне эканамічнай сітуацыі ў Беларусі, і мы кампенсуем страты ад падатковага манеўру". Гэта былі абяцанні. Мы разумелі і гатовыя былі весці перамовы, — заявіў Лукашэнка. — Быццам бы вы на ўзроўні двух урадаў палічылі ўсё, было прынята рашэнне".

Лукашэнка таксама адзначыў, што раней была заява першага віцэ-прэм`ера Расіі Антона Сілуанава, які вёў адпаведныя перамовы, што страты Беларусі немалыя і расійскі бок быў гатовы кампенсаваць гэтыя страты за кошт бюджэту. "І потым раптам усё спынілася. Я хацеў бы атрымаць адказ на пытанне: чаму спыніліся гэтыя перамовы, калі ў прынцыпе ўсё было гатова для прыняцця рашэння нават на саюзным Саўміне ў Брэсце?" — сказаў Лукашэнка.

Ён падкрэсліў, што варыянтаў у ходзе маючых адбыцца перамоў у Крамлі па вырашэнні тых ці іншых пытанняў шмат, але беларускі бок павінен выразна пазначыць і адстойваць сваю пазіцыю.

Крэмль звязвае далейшае льгатаванне беларускай эканомікі са ступенню інтэграцыі дзвюх краін. Расія гатовая і далей прасоўвацца па шляху будаўніцтва Саюзнай дзяржавы, уключаючы стварэнне адзінага эмісійнага цэнтра, адзінай мытнай службы, суда, падліковай палаты, заявіў 13 снежня расійскі прэм`ер-міністр Дзмітрый Мядзведзеў на пасяджэнні саюзнага Саўміна ў Брэсце.

Паводле інфармацыі расійскіх СМІ, 11 снежня на сустрэчы з дэлегацыяй з Беларусі віцэ-прэм`ер РФ Дзмітрый Казак не стаў абмяркоўваць кампенсацыю страт ад падатковага манеўру і даванне зніжкі на газ "да прыняцця прынцыповых рашэнняў аб руху ў кірунку далейшай інтэграцыі Расіі і Беларусі ў рамках Саюзнай дзяржавы".

14 снежня першы віцэ-прэм`ер, міністр фінансаў РФ Антон Сілуанаў заявіў, што Масква не абяцала Мінску выплаціць кампенсацыі з-за рэалізацыі падатковага манеўру ў нафтагазавай галіне Расіі, так як гэтыя змяненні з`яўляюцца ўнутранай справай.

Дзмітрый Уласаў, БелаПАН.

Аўтарызацыя

Імя:
Пароль:

Архіў

  • дзень
  • месяц
  • год

Сюжэты


© 2000 — 2019 БелаПАН. Усе правы абароненыя.
Уся інфармацыя, размешчаная на гэтым сайце, прызначана толькі для персанальнага выкарыстання і не падлягае далейшаму ўзнаўленню і/або распаўсюджванню ў любой форме інакш як з пісьмовага дазволу БелаПАН