На базе Ваеннай акадэміі сфарміраваная ІТ-рота

Мінск, 27 снежня. У Ваеннай акадэміі 26 снежня адкрылася камп'ютарная аўдыторыя роты інфармацыйных тэхналогій, у якой трэба будзе выконваць задачы вайскоўцам новага падраздзялення, паведаміла прэс-служба Мінабароны.

Ва ўрачыстай цырымоніі ўзялі ўдзел міністр абароны Андрэй Раўкоў, начальнік генеральнага штаба Узброеных сіл — першы намеснік міністра Алег Белаконеў і дырэктар Парку высокіх тэхналогій Усевалад Янчэўскі.

"У Ваеннай акадэміі Беларусі, на базе якой сфарміраваная ІТ-рота, створаная неабходная сучасная інфраструктура для працы і пражывання ваеннаслужачых. У навучальнай установе выконваецца шырокі пералік навукова-даследчых работ, функцыянуе навукова-даследчая частка", — адзначаецца ў рэлізе.

Ключавое значэнне маюць праекты, звязаныя з мадэляваннем ваенных дзеянняў, навігацыйным забеспячэннем, распрацоўкай аўтаматызаваных сістэм кіравання і радыёлакацыі. Задачы ваеннаслужачых новага падраздзялення будуць звязаныя "непасрэдна з праграмаваннем".

Першапачатковы конкурс у роту інфармацыйных тэхналогій склаў больш за восем чалавек на месца. Для праходжання службы адабрана 40 вайскоўцаў, якія маюць вышэйшую тэхнічную адукацыю па ІT-спецыяльнасці, а таксама праявілі найбольшую зацікаўленасць у службе ў ІТ-роце. Гаворка ідзе пра маладых людзей, якім у адпаведнасці з заканадаўствам трэба было праходзіць тэрміновую ваенную службу.

"Вайскоўцы прайшлі курс пачатковай ваеннай падрыхтоўкі, выканалі практыкаванні стрэльбаў, прынялі ваенную прысягу, цяпер у іх працягваецца агульнавайсковая падрыхтоўка, затым яны пачнуць выкананне задач па прызначэнні", — паведамляе ведамства.

Мэта стварэння падраздзялення — "далейшае павышэнне эфектыўнасці падрыхтоўкі Узброеных сіл шляхам максімальнага выкарыстання інтэлектуальнага патэнцыялу спецыялістаў у галіне ІТ, распрацоўкі праграмнага забеспячэння, спецыяльных і прыкладных праграм сумесна з падраздзяленнямі Ваеннай акадэміі і іншымі навуковымі і навучальнымі ўстановамі Узброеных сіл".

Пра тое, што ў 2018 годзе ў ВС створаць спецыялізаваную роту, якая будзе займацца пытаннямі інфармацыйнай і кібербяспекі, паведаміў Раўкоў у інтэрв'ю праграме "Контуры" тэлеканала ОНТ 25 лютага.