Беларуская інфармацыйная кампанія
Адрас старонкі: https://by.belapan.by/archive/2018/12/28/986810_986832/
Дата раздрукоўкі: 29.09.2020 17:28
28.12.2018 15:49 Грамадства, Эканоміка

Устаноўленыя новыя тарыфы на электраэнергію

Мінск, 28 снежня. Устаноўленыя новыя тарыфы на электраэнергію на падставе пастановы ўрада ад 27 снежня, паведамляе прэс-служба Саўміна.

Тарыф на электраэнергію ў жылых дамах (кватэрах), абсталяваных электрычнымі плітамі, складзе 0,1218 рубля за 1 кВт⋅ч. Дыферэнцыяваны тарыф па часавых перыядах: у перыяд мінімальных нагрузак (з 22.00 да 17.00) — 0,0853 рубля за 1 кВт⋅ч, максімальных нагрузак (з 17.00 да 22.00) — 0,2436 рубля за 1 кВт⋅ч.

Тарыф на электраэнергію для патрэб ацяплення і гарачага водазабеспячэння з далучанай (сумарнай) магутнасцю абсталявання больш за 5 кВт у перыяд мінімальных нагрузак (з 23.00 да 6.00) складзе 0,1003 рубля за 1 кВт⋅ч, а ў астатні час сутак — 0,1863 рубля за 1 кВт⋅ч.

Пры выкарыстанні электраэнергіі для патрэб ацяплення і гарачага водазабеспячэння ў кватэрах шматкватэрных жылых дамоў, не абсталяваных сістэмамі цэнтралізаванага цепла- і газазабеспячэння і асобнымі лічыльнікамі для электрычнасці на гэтыя патрэбы, але абсталяваных электраплітамі, тарыф складзе 0,0687 рубля за 1 кВт⋅ч.

Пастанова ўваходзіць у сілу пасля яе афіцыйнага апублікавання і распаўсюджвае сваё дзеянне на адносіны, якія ўзніклі з 1 снежня 2018 года.

Як паведамлялася раней, тарыфы на паслугі ЖКГ для насельніцтва павышаюцца 1 студзеня. Адпаведны ўказ Аляксандр Лукашэнка падпісаў 22 снежня.

У выніку прымянення зацверджаных тарыфаў жыллёва-камунальныя плацяжы для насельніцтва, у разліку на тыпавую двухпакаёвую кватэру з трыма жыхарамі, пры нарматыўным спажыванні імі паслуг павысяцца ў межах 5 долараў.

Тарыфы будуць павышацца ў два этапы. 1 студзеня вырастуць (сумарна на 3,9 долара) тарыфы на паслугі газа-, электра- і водазабеспячэння, водаадвядзення, на капітальны рамонт, санітарнае ўтрыманне дапаможных памяшканняў жылога дома, памеры кампенсацыі выдаткаў на электраэнергію.

1 чэрвеня, пасля завяршэння ацяпляльнага сезона, тарыф на паслугі цеплазабеспячэння для патрэб ацяплення і гарачага водазабеспячэння будзе павышаны на 1,1 долара. Тарыфы на тэхнічнае абслугоўванне жылога дома, ліфта, абарачэнне з цвёрдымі камунальнымі адходамі захоўваюцца на ўзроўні 2018 года.

Аляксей Аляксандраў, БелаПАН.

Аўтарызацыя

Імя:
Пароль:

Архіў

  • дзень
  • месяц
  • год

Сюжэты


© 2000 — 2020 БелаПАН. Усе правы абароненыя.
Уся інфармацыя, размешчаная на гэтым сайце, прызначана толькі для персанальнага выкарыстання і не падлягае далейшаму ўзнаўленню і/або распаўсюджванню ў любой форме інакш як з пісьмовага дазволу БелаПАН

.239