Беларуская інфармацыйная кампанія
Адрас старонкі: https://by.belapan.by/archive/2019/01/01/986757_478569/
Дата раздрукоўкі: 13.11.2019 02:47
01.01.2019 08:05 Эканоміка, Фінансы

У новым годзе ў Беларусі будзе ўкаранёная сістэма імгненных плацяжоў

Мінск, 1 студзеня. У Беларусі пачынаецца доследная эксплуатацыя сістэмы імгненных плацяжоў (СІП). Паводле інфармацыі Нацбанка, укараніць яе ў прамысловую эксплуатацыю плануецца 1 ліпеня 2019 года.

Інавацыйная сістэма імгненных плацяжоў дазволіць кліентам беларускіх банкаў ажыццяўляць аплату тавараў, работ, паслуг, выкананне абавязацельстваў перад бюджэтам у рэжыме рэальнага часу кругласутачна без выхадных і святаў.

Да гэтага часу ў Беларусі існуюць часовыя абмежаванні па прыёме і апрацоўцы плацяжоў у будныя, святочныя і выходныя дні, калі аўтаматызаваная сістэма міжбанкаўскіх разлікаў Нацбанка і большасць аўтаматызаваных банкаўскіх сістэм не працуюць.

Інструкцыю аб парадку функцыянавання СІП і правядзення імгненных плацяжоў Нацбанк зацвердзіў 20 лістапада мінулага года. Яна вызначае парадак працы СІП і прававое поле для функцыянавання сістэмы. У дакуменце дадзеныя азначэнні асноўных тэрмінаў і паняцце шасці асноўных асаблівасцяў працы СІП, устаноўлены парадак яе функцыянавання, умовы прыёму, правядзення і апрацоўкі імгненных плацяжоў, прававыя паўнамоцтвы Нацбанка і ААТ "Беларускі міжбанкавы разліковы цэнтр", патрабаванні да банкаў — удзельнікаў СІП.

Пад выкананнем імгненнага плацяжу маецца на ўвазе спісанне грошай з рахунку плацельшчыка і іх залічэнне на рахунак атрымальніка на працягу адной хвіліны праз скразную бесперапынную апрацоўку імгненных плацяжоў (г. зн. прадугледжваецца поўная аўтаматызацыя ўсіх працэсаў).

Для выканання імгненных плацяжоў банкі павінны будуць кантраляваць дастатковасць сродкаў на рахунках плацельшчыкаў, правяраць плацеж, які паступіў, рэзерваваць грошы на сваіх карэспандэнцкіх рахунках у памеры, дастатковым для правядзення меркаваных аб'ёмаў плацяжоў, у тым ліку для працы ноччу, у выхадныя і святы. Удзел банкаў у СІП будзе мець добраахвотны характар, а канкрэтныя ўмовы ажыццяўлення імгненных плацяжоў будуць вызначацца ў дамове, заключанай банкам — удзельнікам СІП з плацельшчыкам.

"Укараненне СІП з'яўляецца чарговым крокам па ўдасканаленні плацежнай сістэмы Беларусі з улікам сусветных тэндэнцый, таму што дасць магчымасць ажыццяўляць плацяжы больш хуткім, надзейным і адносна недарагім спосабам за кошт эканоміі транзакцыйных выдаткаў для ўдзельнікаў працэсу ажыццяўлення імгненнага плацяжу", — падкрэслілі ў Нацбанку.

Марына Носава, БелаПАН.

Аўтарызацыя

Імя:
Пароль:

Архіў

  • дзень
  • месяц
  • год

Сюжэты


© 2000 — 2019 БелаПАН. Усе правы абароненыя.
Уся інфармацыя, размешчаная на гэтым сайце, прызначана толькі для персанальнага выкарыстання і не падлягае далейшаму ўзнаўленню і/або распаўсюджванню ў любой форме інакш як з пісьмовага дазволу БелаПАН