Беларуская інфармацыйная кампанія
Адрас старонкі: https://by.belapan.by/archive/2019/01/04/987510_987511/
Дата раздрукоўкі: 28.10.2020 13:42
04.01.2019 21:33 Грамадства

Грамадзянін Літвы прыгавораны ў Беларусі да 15 гадоў калоніі за пастаўкі мараканскага гашышу

Мінск, 4 студзеня. Суд Барысаўскага раёна 29 снежня 2018 года вынес прыгавор грамадзяніну Літвы, які абвінавачваўся ў незаконным абароце і перамяшчэнні праз мяжу буйной партыі гашышу.

Як паведамляе прэс-служба МУС, па сукупнасці злачынстваў яму прызначана пакаранне ў выглядзе 15 гадоў пазбаўлення волі з адбываннем пакарання ў папраўчай калоніі ва ўмовах узмоцненага рэжыму з канфіскацыяй маёмасці.

МУС нагадвае, што ў 2016 годзе міліцыяй былі выкрытыя ўдзельнікі міжнароднага наркакартэля, якія займаліся пастаўкамі ў Беларусь і Расію мараканскага гашышу. Усяго ўдзельнікі злачыннай арганізацыі пераправілі больш за тону наркотыку ў краіны ЕАЭС. Затрыманням папярэднічала карпатлівая праца беларускіх аператыўнікаў наркакантролю і следчых па аналізе і дакументаванні дзейнасці асобных членаў і груп, якія ўваходзілі ў арганізацыю.

"Дзеянні зламыснікаў былі дакладна прадуманы і добра арганізаваны, размеркаваны ролі і функцыі кожнага. Гашыш пастаўляўся ў нашу рэспубліку з Іспаніі і перавозіўся буйнымі партыямі (каля ста кілаграмаў кожная) на пазадарожніках у прафесійна абсталяваных тайніках. Па шляху не раз адбывалася змена аўтамабіляў, выконвалася строгая канспірацыя. За найменшыя парушэнні "графіка" на кур'ера накладаліся штрафныя санкцыі", — гаворыцца ў паведамленні МУС.

Адзначаецца таксама, што выявіць наркотык у ходзе звычайнага мытнага надгляду не ўяўлялася магчымым: тайнікі і швы замазваліся, апрацоўваліся спецыяльнымі хімічнымі рэчывамі, канструкцыя аўтамабіля пры гэтым не парушалася. А ў некаторых выпадках, каб дастаць тавар, даводзілася вымаць рухавік.

Сярод шаснаццаці фігурантаў крымінальных спраў былі грамадзяне Беларусі, Украіны, Літвы, Малдовы. Затрыманні ўдзельнікаў адбываліся як на тэрыторыі Беларусі, так і ў суседніх Польшчы і Расіі — па запытах беларускіх праваахоўнікаў.

Аляксей Арэшка, БелаПАН.

Аўтарызацыя

Імя:
Пароль:

Архіў

  • дзень
  • месяц
  • год

Сюжэты




© 2000 — 2020 БелаПАН. Усе правы абароненыя.
Уся інфармацыя, размешчаная на гэтым сайце, прызначана толькі для персанальнага выкарыстання і не падлягае далейшаму ўзнаўленню і/або распаўсюджванню ў любой форме інакш як з пісьмовага дазволу БелаПАН

.239