Беларуская інфармацыйная кампанія
Адрас старонкі: https://by.belapan.by/archive/2019/02/11/992298_992299/
Дата раздрукоўкі: 24.04.2019 13:45
11.02.2019 15:28 Грамадства

Гродзенскія мытнікі затрымалі расіяніна з 63 кілаграмамі гашышу

Мінск, 11 лютага. На беларуска-літоўскай мяжы затрыманы 48-гадовы грамадзянін Расіі, які спрабаваў увезці ў Беларусь 63 кг гашышу, паведамляе Гродзенская рэгіянальная мытня.

Буйная партыя наркотыку была схаваная ў спецыяльна абсталяваным пад сядзеннямі аўтамабіля KIA Sorento тайніку. Расіянін, які перамяшчаў гашыш, уязджаў з Літвы праз пункт пропуску "Каменны Лог" па "зялёным" калідоры. "Пасля прапановы мытнікаў прайсці на агляд транспартнага сродку з дапамогай інспекцыйна-надгляднага комплексу, кіроўца зрабіў спробу самавольна пакінуць пункт пропуску, але быў затрыманы пагранічным нарадам", — удакладнілі ў мытні.

Пры аглядзе аўтамабіля мытнікі дасталі з тайніка 67 брыкетаў з рэчывам цёмна-карычневага колеру. Эксперт Лідскага міжраённага аддзела ўпраўлення Дзяржаўнага камітэта судовых экспертыз па Гродзенскай вобласці ўстанавіў, што спрасаванае смалістае рэчыва ў адным з брыкетаў з'яўляецца гашышам.

За парушэнне рэжыму ў пункце пропуску грамадзянін РФ прыцягнуты да адказнасці ў адпаведнасці з арт. 23.32 КоАП у выглядзе штрафу ў 40 базавых велічынь (1.020 рублёў).

Распачатая справа па прыкметах злачынства, прадугледжанага ч. 2 арт. 328-1 КК (незаконнае перамяшчэнне праз мяжу наркатычных сродкаў, псіхатропных рэчываў або іх прэкурсораў або аналагаў у буйным памеры з адсутнасцю прыкмет кантрабанды). Праводзяцца неадкладныя следча-працэсуальныя дзеянні. Па падазрэнні ў здзяйсненні злачынства грамадзянін затрыманы.

Аляксей Аляксандраў, БелаПАН.

Аўтарызацыя

Імя:
Пароль:

Архіў

  • дзень
  • месяц
  • год

Сюжэты


© 2000 — 2019 БелаПАН. Усе правы абароненыя.
Уся інфармацыя, размешчаная на гэтым сайце, прызначана толькі для персанальнага выкарыстання і не падлягае далейшаму ўзнаўленню і/або распаўсюджванню ў любой форме інакш як з пісьмовага дазволу БелаПАН