Беларуская інфармацыйная кампанія
Адрас старонкі: https://by.belapan.by/archive/2019/02/25/eu_994275_12345/
Дата раздрукоўкі: 02.12.2020 09:27
25.02.2019 18:40 Палітыка, Беларусь — Еўрасаюз

МЗС: Працяг санкцый ЕС выклікае шкадаванне

Мінск, 25 лютага. Працяг Еўрасаюзам эмбарга на пастаўкі беларускай зброі і тэхнікі, а таксама візавых санкцый супраць чатырох грамадзян Беларусі "цалкам разыходзяцца з цяперашнім характарам адносін паміж Беларуссю і ЕС", заявіў БелаПАН прэс-сакратар МЗС Анатоль Глаз.

"Мы прынялі да ведама інфармацыю пра рашэнне ЕС. Яна не выклікае нічога, акрамя шкадавання, — адзначыў Глаз. — Санкцыі з`яўляюцца перажыткам мінулага і цалкам разыходзяцца з цяперашнім характарам адносін паміж Беларуссю і Еўрасаюзам, якія робяцца ўсё больш змястоўнымі і канструктыўнымі".

Паводле слоў прадстаўніка МЗС, прагматычнае і адкрытае супрацоўніцтва паміж Беларуссю і ЕС па ўсё большым коле тэм рана ці позна перасіліць логіку санкцый, якія даказалі сваю неэфектыўнасць.

Беларусь, адзначыў ён, гатовая да паўнавартасных, добрасуседскіх і партнёрскіх адносінаў з Еўрасаюзам.

Савет ЕС 25 лютага працягнуў яшчэ на год, да 28 лютага 2020 года, абмежавальныя меры ў дачыненні да Беларусі. Меры ўключаюць у сябе эмбарга на пастаўкі зброі і тэхнікі, якія могуць быць выкарыстаныя для рэпрэсій унутры краіны, а таксама "замарожванне актываў і забарону на паездкі для чатырох чалавек", бо іх лічаць "датычнымі да нераскрытых знікненняў двух апазіцыйных палітыкаў, бізнесмена і журналіста ў 1999 і 2000 гадах".

"Савет таксама працягнуў забарону на прымяненне абмежавальных мер на экспарт біятлоннага рыштунку і спартыўных вінтовак і спартыўных пісталетаў спецыяльнага прызначэння ў Беларусь", — адзначаецца ў паведамленні Савета.

Першапачаткова ў санкцыйны спіс Еўрасаюза ўваходзілі чатыры беларускія чыноўнікі — Уладзімір Навумаў, Віктар Шэйман, Юрый Сівакоў і Дзмітрый Паўлічэнка. На думку ЕС, яны маюць дачыненне да знікнення ў Беларусі апанентаў улады ў 1999—2000 гадах.

У снежні 2004 года, пасля парламенцкіх выбараў і рэферэндуму, паводле вынікаў якога Аляксандр Лукашэнка атрымаў права абірацца на пасаду прэзідэнта неабмежаваную колькасць разоў, спіс папоўнілі кіраўнік ЦВК Лідзія Ярмошына і начальнік палка міліцыі спецпрызначэння Юрый Падабед. 

У 2006 годзе спіс пашырылі да 41 чалавека, якія, на думку ЕС, былі адказныя за парушэнне правоў чалавека падчас прэзідэнцкай кампаніі. У спіс быў уключаны і Аляксандр Лукашэнка. 

У кастрычніку 2008 года дзеянне санкцый у дачыненні да Лукашэнкі і яшчэ 35 чалавек было прыпыненае. 

Дзеянне санкцый ЕС у дачыненні да Беларусі было адноўленае і пашыранае пасля прэзідэнцкіх выбараў 2010 года, якія завяршыліся жорсткім разгонам мірнай дэманстрацыі ў Мінску, арыштам большасці альтэрнатыўных кандыдатаў у прэзідэнты і масавымі рэпрэсіямі ў дачыненні да грамадзянскай супольнасці. 

На працягу наступных пяці гадоў чорны спіс ЕС неаднаразова мяняўся: некаторых фізічных асоб і прадпрыемствы з яго выключалі, іншых — уносілі. Акрамя гэтага, у 2011 годзе ЕС увёў эмбарга на пастаўкі зброі. 

15 лютага 2016 года Савет ЕС прыняў рашэнне зняць абмежавальныя меры ў дачыненні да 170 фізічных асоб і 4 кампаній. Пад санкцыямі засталіся Уладзімір Навумаў, Віктар Шэйман, Юрый Сівакоў і Дзмітрый Паўлічэнка. Таксама было захаванае эмбарга на пастаўкі зброі і забарона на экспарт тавараў для ўнутраных рэпрэсій. 

У лютым 2017 года санкцыі былі працягнутыя на год. Пры гэтым ЕС дазволіў экспарт у Беларусь біятлоннага рыштунку. 

Чарговым разам абмежавальныя меры ў дачыненні да Беларусі Савет ЕС працягнуў у лютым мінулага года.

Аляксей Аляксандраў, БелаПАН.

Аўтарызацыя

Імя:
Пароль:

Архіў

  • дзень
  • месяц
  • год

Сюжэты




© 2000 — 2020 БелаПАН. Усе правы абароненыя.
Уся інфармацыя, размешчаная на гэтым сайце, прызначана толькі для персанальнага выкарыстання і не падлягае далейшаму ўзнаўленню і/або распаўсюджванню ў любой форме інакш як з пісьмовага дазволу БелаПАН

.239