Беларуская інфармацыйная кампанія
Адрас старонкі: https://by.belapan.by/archive/2019/11/06/ru_1022865_102547/
Дата раздрукоўкі: 17.11.2019 20:41
06.11.2019 14:21 Эканоміка, Фінансы

Нацбанк зніжае стаўку рэфінансавання да 9% гадавых

Мінск, 6 лістапада. Стаўка рэфінансавання 20 лістапада будзе зніжаная з 9,5 да 9% гадавых. Такое рашэнне прыняло праўленне Нацыянальнага банка 6 лістапада паводле вынікаў пасяджэння па грашова-крэдытнай палітыцы.

Як растлумачылі ў прэс-службе Нацбанка, у III квартале 2019 года інтэнсіўнасць інфляцыйных працэсаў працягнула запавольвацца. Дынаміка фактычнай гадавой інфляцыі, якая ў верасні 2019 года склала 5,3%, фармуецца ў адпаведнасці з прагнознымі ацэнкамі Нацыянальнага банка. Чакаецца, што ў канцы 2019 года і на працягу 2020-га інфляцыя будзе знаходзіцца блізу 5%.

Прынятыя рашэнні забяспечваюць захаванне нейтральнага характару грашова-крэдытнай палітыкі, адзначае рэгулятар.

Паводле інфармацыі Нацбанка, 20 лістапада будуць зніжаныя таксама стаўка па крэдыце авернайт з 10,75 да 10% гадавых і стаўка па дэпазіце авернайт — з 8,25 да 8% гадавых.

"Абранае зніжэнне ставак па крэдыце і дэпазіце авернайт забяспечыць звужэнне калідора працэнтных ставак па інструментах рэгулявання ліквіднасці банкаў да 2 працэнтных пунктаў. У далейшым гэтыя стаўкі будуць змяняцца адначасова са стаўкай рэфінансавання на адпаведную велічыню", — паведамляе рэгулятар.

Папярэдні раз Нацбанк знізіў стаўку рэфінансавання 14 жніўня з 10 да 9,5% гадавых. Да гэтага на працягу апошняга года рэгулятар адкладаў зніжэнне стаўкі рэфінансавання, абгрунтоўваючы такое рашэнне некаторым паскарэннем інфляцыйных працэсаў у краіне.

Згодна з афіцыйным прагнозам рэгулятара, у 2019 годзе інфляцыя не павінна перавысіць 5%. У верасні рост цэн склаў 0,5%, з пачатку года — 3,4%.

Чарговае пасяджэнне праўлення Нацыянальнага банка па грашова-крэдытнай палітыцы запланаванае 12 лютага 2020 года.

Аляксей Арэшка, БелаПАН.

Аўтарызацыя

Імя:
Пароль:

Архіў

  • дзень
  • месяц
  • год

Сюжэты


© 2000 — 2019 БелаПАН. Усе правы абароненыя.
Уся інфармацыя, размешчаная на гэтым сайце, прызначана толькі для персанальнага выкарыстання і не падлягае далейшаму ўзнаўленню і/або распаўсюджванню ў любой форме інакш як з пісьмовага дазволу БелаПАН