Беларуская інфармацыйная кампанія
Адрас старонкі: https://by.belapan.by/archive/2020/03/02/ru_1034571_123/
Дата раздрукоўкі: 18.01.2021 16:27
02.03.2020 17:27 Грамадства

Міністэрства аховы здароўя: Пацверджаныя тры выпадкі захворвання на каранавірус

Мінск, 2 сакавіка. У Беларусі пацверджаныя тры выпадкі захворвання на каранавірус, паведаміла намеснік міністра аховы здароўя, галоўны санітарны ўрач Наталля Жукава на прэс-канферэнцыі ў Мінску 2 сакавіка.

Паводле яе слоў, праведзеныя тэсты маюць "высокую ступень дакладнасці", медыкі ўпэўненыя ў выніках працы беларускіх лабараторый. Тым не менш тэсты будуць пераправяраць у лабараторыі Сусветнай арганізацыі аховы здароўя. "Існуе такая практыка — накіроўваць як станоўчыя, так і адмоўныя вынікі для яшчэ аднаго пацвярджэння, — растлумачыла Жукава. — Трэба адзначыць, што і мы самі праводзім паралельныя даследаванні не ў адной лабараторыі, для таго каб пераканацца і дакладна разумець, наколькі правільныя нашы вынікі".

Галоўны санітарны ўрач паведаміла, што для сістэмы аховы здароўя станоўчыя вынікі тэстаў на каранавірус азначаюць "вялікі аб`ём працы па пошуку і абследаванні кантактаў заражаных". Жукава падкрэсліла, што проста так, па жаданні, здаваць тэсты не трэба. "Парадак абследавання эпідэміялагічна абгрунтаваны і адпавядае сітуацыі ў краіне. Перш за ўсё абследуюцца тыя, хто наведаў эпідэміялагічна неспрыяльныя краіны. Затым — блізкія кантакты тых, хто захварэў, а таксама асобы з сімптомамі захворвання, якія наведвалі гэтыя краіны ці кантактавалі з людзьмі, што вярнуліся з іх", — сказала прадстаўнік Міністэрства аховы здароўя.

Жукава падкрэсліла, што абследаванне праводзіцца толькі паводле прызначэння лекара. У цэлым, запэўніла яна, эпідэміялагічная сітуацыя ў краіне нармальная, сезоннае захворванне на вострыя рэспіраторныя інфекцыі на 5—10%, у залежнасці ад рэгіёна, ніжэйшае за ўзровень мінулага года. У межах абследавання на каранавірус у людзей выяўляюць ВРЗ, розныя вірусныя інфекцыі, у тым ліку адзінкавыя выпадкі грыпу.

Начальнік галоўнага ўпраўлення арганізацыі медыцынскай дапамогі і экспертызы Міністэрства аховы здароўя Алена Богдан падкрэсліла, што тры пацверджаныя выпадкі COVID-19 выяўленыя "ў выніку прыняцця прэвентыўных мер". Два пацыенты знаходзяцца ў медустановах Мінска, яшчэ адзін (жанчына) — у Віцебску. На просьбу расказаць пра гэтых людзей Богдан заявіла, што ўрачы не могуць без згоды пацыентаў выдаваць такія звесткі.

Начальнік галоўнага ўпраўлення па ахове здароўя Віцебскай вобласці Юрый Дзяркач пацвердзіў, што пацыентка ў Віцебску знаходзіцца ў абсервацыйным аддзяленні, яе стан здавальняе, тэмпература нармальная, лячэнне не патрабуецца.

Паводле інфармацыі міністэрства, зараз пад наглядам ва ўстановах аховы здароўя краіны знаходзіцца 271 чалавек. Выпісана 247 чалавек, у тым ліку студэнты з Кітая, якія знаходзіліся ў санаторыі "Брыганціна" і рэабілітацыйным цэнтры "Загор`е".

Міністэрства аховы здароўя не плануе ініцыяваць адмену масавых мерапрыемстваў і закрываць на каранцін установы адукацыі. "Мы не ставім такой задачы, для гэтага няма падстаў", — заявіла Жукава.

Ірына Турчына, БелаПАН.

Аўтарызацыя

Імя:
Пароль:

Архіў

  • дзень
  • месяц
  • год

Сюжэты




© 2000 — 2021 БелаПАН. Усе правы абароненыя.
Уся інфармацыя, размешчаная на гэтым сайце, прызначана толькі для персанальнага выкарыстання і не падлягае далейшаму ўзнаўленню і/або распаўсюджванню ў любой форме інакш як з пісьмовага дазволу БелаПАН

.239