Беларуская інфармацыйная кампанія
Адрас старонкі: https://by.belapan.by/archive/2020/03/09/ru_1035207_885522/
Дата раздрукоўкі: 28.05.2020 10:43
09.03.2020 12:46 Эканоміка, Фінансы

Долар у абменных пунктах падаражэў да 2 рублёў 40 капеек

Мінск, 9 сакавіка. Пасля таргоў 9 сакавіка курс долара ў абменных пунктах беларускіх банкаў павысіўся да 2 рублёў 40 капеек. Раніцай у панядзелак долар можна было купіць за 2 рублі 23 капейкі. Далейшыя падзеі будуць залежаць ад двух фактараў — сітуацыі ў Расіі і на нафтавым рынку, адзначаюць эксперты.

Пры гэтым беларускія банкі ўсталявалі вялікую розніцу паміж курсам куплі і продажу замежнай валюты. Так, на 12.00 "БПС-Ашчадбанк" прадаваў долар за 2 рублі 40 капеек, а купляў — за 2 рублі 25 капеек. Дзяржаўны "Белінвестбанк" устанавіў курс продажу на такім жа ўзроўні (2 рублі 40 капеек), а купляе долары за 2 рублі 30 капеек.

На думку аналітыкаў фінансавага рынку, вялікая розніца паміж курсам куплі і продажу — гэта заканамерная рэакцыя беларускіх банкаў на сітуацыю ў свеце.

"У панядзелак нафта прасела на сусветным рынку на 30% і наблізілася да 30 долараў за бараль. На такім нізкім узроўні нафта не знаходзілася з часоў нафтавага крызісу 2015 года. Натуральна, такая сітуацыя пацягнула ўніз расійскі рубель, што неадкладна адбілася на сітуацыі ў Беларусі", — адзначыў старшы аналітык Forex Club Валерый Палхоўскі.

Паводле яго слоў, прагназаваць развіццё сітуацыі на валютным рынку даволі складана. "Ва ўмовах, калі высокая няпэўнасць, беларускія банкі сталі ўсталёўваць вялікую розніцу паміж курсам куплі і продажу замежнай валюты", — растлумачыў аналітык.

Далейшае развіццё падзей у Беларусі будзе залежаць ад двух фактараў — сітуацыі ў Расіі і на нафтавым рынку, адзначаюць эксперты.

"Долар у Расіі стаў каштаваць больш за 73 рублі. Як будзе мяняцца курс расійскага рубля ў далейшым, залежыць у тым ліку ад дзеянняў Цэнтрабанка — ці будзе ён згладжваць валатыльнасць за кошт рэзерваў", — кажа Палхоўскі.

На думку аналітыкаў, сапраўднай прычынай высокай валатыльнасці стаў канфлікт паміж найбуйнейшымі пастаўшчыкамі нафты на сусветным рынку (Расіяй і Саудаўскай Аравіяй), якія не дамовіліся ў мінулыя выхадныя аб сваіх паводзінах на рынку. "У сувязі з гэтым цэны на нафту і пайшлі ўніз, што непазбежна прывяло да карэктавання валютных курсаў як у Расіі, так і ў Беларусі", — адзначыў у каментары БелаПАН старшы аналітык "Альпары" Вадзім Іосуб.

Разам з тым, лічыць ён, надзея на паступовую нармалізацыю сітуацыі ёсць. "У першай палове дня нафта на сусветным рынку апусцілася да 31 долара за бараль, а ў сярэдзіне дня ўжо таргавалася па 36 долараў за бараль. Калі нафта працягне аднаўляцца, то і курс долара ў Расіі і ў Беларусі стане зніжацца", — прагназуе Іосуб.

Дзмітрый Заяц, БелаПАН.

Аўтарызацыя

Імя:
Пароль:

Архіў

  • дзень
  • месяц
  • год

Сюжэты


© 2000 — 2020 БелаПАН. Усе правы абароненыя.
Уся інфармацыя, размешчаная на гэтым сайце, прызначана толькі для персанальнага выкарыстання і не падлягае далейшаму ўзнаўленню і/або распаўсюджванню ў любой форме інакш як з пісьмовага дазволу БелаПАН

.239