Пуцін: Расія прызнае легітымнымі прэзідэнцкія выбары ў Беларусі, а Лукашэнку — іх пераможцам

Мінск, 29 жніўня. Расія прызнае легітымнымі прэзідэнцкія выбары ў Беларусі, а Аляксандра Лукашэнку — іх пераможцам. Пра гэта, як перадае ТАСС, прэзідэнт РФ Уладзімір Пуцін заявіў у інтэрв'ю, паказаным праграмай "Весткі ў суботу" на тэлеканале "Россия 1".

"Мы зыходзім з таго, што выбары адбыліся. Я адразу гэта зрабіў, мы прызналі іх легітымнасць, і, як вы ведаеце, я павіншаваў Аляксандра Рыгоравіча Лукашэнку з перамогай на гэтых выбарах. Усё", — сказаў Пуцін.

На яго думку, адмова прадстаўнікоў Бюро па дэмакратычных інстытутах і правах чалавека (БДІПЧ) АБСЕ прыехаць на выбары ў Беларусь дае падставу падазраваць, што пазіцыя Захаду ў дачыненні да гэтага працэсу была загадзя падрыхтаваная. "Беларускія ўлады запрасілі БДІПЧ АБСЕ ўзяць удзел у кантролі над выбарамі. Чаго ж яны не прыехалі? Гэта адразу нас наводзіць на думку аб тым, што ўжо была, уласна кажучы, падрыхтаваная пазіцыя паводле вынікаў гэтых выбараў", — сказаў ён.

На думку Пуціна, хтосьці можа сумнявацца ў выніках беларускіх выбараў, аднак "нічога ідэальнага ў свеце не існуе, ні ў палітыцы, ні ў эканоміцы, ні ў сацыяльнай сферы". "Нават у прыродзе няма нічога ідэальнага, хоць гэта найбольш дасканалая Богам створаная сфера. У мяне ёсць усе падставы сумнявацца ў тым, што тыя, хто сумняваецца, былі абсалютна сумленнымі", — заявіў расійскі прэзідэнт.