Беларуская інфармацыйная кампанія
Адрас старонкі: https://by.belapan.by/archive/2020/09/25/ru_1061412_123/
Дата раздрукоўкі: 28.10.2020 11:47
25.09.2020 14:30 Грамадства, Палітыка, Спорт

Свабоднае аб'яднанне спартсменаў Беларусі заклікала калег падтрымаць прыхільнікаў перамен

Мінск, 25 верасня. Створаная вядомымі беларускімі спартоўцамі ініцыятыва "Свабоднае аб'яднанне спартсменаў Беларусі" заклікала калег падтрымаць прыхільнікаў перамен. Відэазварот апублікаваны ў "Інстаграме" ініцыятывы.

"Мы — Свабоднае аб'яднанне спартсменаў Беларусі, звычайна мы прадстаўляем краіну на спартыўнай арэне, — кажа на відэа баскетбалістка Алена Леўчанка. — Мы з гонарам стаім у адным шэрагу з лепшымі спартсменамі свету. Цяпер мы адчуваем сябе абавязанымі прадставіць голас беларускага народа. Мы звяртаемся да калег-спартсменаў, заўзятараў і ўсіх людзей на планеце".

"Дзяржаўныя органы штодня і паўсюль парушаюць Канстытуцыю, законы і Алімпійскую хартыю і базавыя правы чалавека", — працягнуў валейбаліст Артур Удрыс.

"Людзей запалохваюць, затрымліваюць, рэпрэсуюць і катуюць, — дадала фрыстайлістка Аляксандра Раманоўская. — Маштаб жорсткасці проста неймаверны. Чытанне навін параўнальнае з эмацыйным згвалтаваннем".

"Калі ласка, станьце на наш бок у гэтай вайне паміж дабром і злом. Будзьце сумленнымі, смелымі — словам і справай. Будзьце героямі, такімі ж, як тысячы беларусаў. Дзейнічайце на карысць усяго чалавецтва", — завяршыў зварот баскетбаліст Ягор Мешчаракоў.

Пра стварэнне Свабоднага аб'яднання спартсменаў Беларусі было абвешчана ў пачатку верасня. На той момант у яго склад увайшлі алімпійская прызёрка плыўчыха Аляксандра Герасіменя, алімпійская прызёрка штурхальніца ядра Надзея Астапчук, капітан нацыянальнай каманды па баскетболе Кацярына Сныціна і баскетбалістка Алена Леўчанка, баскетбалісты Мікіта і Ягор Мешчараковы, самбіст Сцяпан Папоў, валейбаліст Артур Удрыс, заснавальнік гандбольнага клуба "Віцязь" Аляксандр Апейкін і галоўны трэнер "Віцязя" Канстанцін Якаўлеў.

Захар Шчарбакоў, БелаПАН.

Аўтарызацыя

Імя:
Пароль:

Архіў

  • дзень
  • месяц
  • год

Сюжэты




© 2000 — 2020 БелаПАН. Усе правы абароненыя.
Уся інфармацыя, размешчаная на гэтым сайце, прызначана толькі для персанальнага выкарыстання і не падлягае далейшаму ўзнаўленню і/або распаўсюджванню ў любой форме інакш як з пісьмовага дазволу БелаПАН

.239