Карэспандэнт тэлеканала "Белсат" Арцём Лява арыштаваны на 15 сутак

Мінск, 11 лістапада. Карэспандэнт тэлеканала "Белсат" Арцём Лява арыштаваны на 15 сутак за ўдзел у несанкцыянаваным масавым мерапрыемстве (арт. 23.34 КоАП), паведамляе Беларуская асацыяцыя журналістаў (БАЖ).

Такое рашэнне прыняла 11 лістапада суддзя суда Першамайскага раёна Мінска Анастасія Ляйкоўская.

Ляву затрымалі ў Мінску 8 лістапада. Тады ж у сталіцы былі затрыманыя журналіст БелаПАН Ян Аўсеюшкін, фотажурналісты Святаслаў Зоркі ("Комсомольская правда" в Белоруссии") і Віктар Талочка, у Віцебску — журналістка Алена Шабуня, якая супрацоўнічае з "Белсатам".

На сённяшні дзень, згодна са звесткамі БАЖ, у зняволенні застаюцца 17 журналістаў.