Беларуская інфармацыйная кампанія
Адрас старонкі: https://by.belapan.by/archive/2021/01/04/eu_1073310_123/
Дата раздрукоўкі: 25.01.2021 19:39
04.01.2021 16:50 Грамадства, Палітыка, Беларусь — Еўрасаюз

Да канца 2022 года Польшча не будзе збіраць з беларускіх грамадзян плату за афармленне нацыянальнай візы

Мінск, 4 студзеня. З грамадзян Беларусі да 31 снежня 2022 года не будзе збірацца консульскі збор за афармленне нацыянальнай візы Польшчы.

Гэта вынікае з пастановы Міністэрства замежных спраў Польшчы № 2402 ад 22 снежня 2020 года, апублікаванай у польскай інтэрнэт-сістэме прававых актаў.

У пастанове таксама гаворыцца пра абнуленне консульскага збору за афармленне шэнгенскай візы для грамадзян Беларусі ва ўзросце ад 12 да 18 гадоў і беларусаў ва ўзросце да 25 гадоў, якія бяруць удзел у семінарах, канферэнцыях, спартыўных, культурных або адукацыйных мерапрыемствах, арганізаваных некамерцыйнымі арганізацыямі.

Дакумент набыў моц 1 студзеня 2021 года.

Як паведамляецца на сайце Кіраўніцтва па справах замежнікаў Польшчы, нацыянальная віза дае права на ўезд, у тым ліку шматразовы, і бесперапыннае пражыванне на тэрыторыі краіны агульнай працягласцю больш за 90 дзён. Перыяд дзеяння нацыянальнай візы не можа перавышаць адзін год.

2 снежня мінулага года ўрад Літвы прыняў прапанову свайго Міністэрства замежных спраў выдаваць нацыянальныя візы беларусам, якія пацярпелі ад рэпрэсій.

"З-за гвалту, учыненага беларускім рэжымам супраць сваіх грамадзян, і масавых парушэнняў правоў чалавека ўсё больш і больш грамадзян Беларусі, якія шукаюць прытулку і часовай абароны, хочуць прыехаць у Літву, — цытавала прэс-служба ўрада Саўлюса Сквярняліса, які выконваў на той момант абавязкі прэм`ер-міністра. — Для ўезду і знаходжання ў Літве на больш доўгі тэрмін грамадзянам Беларусі было неабходна атрымаць доўгатэрміновую нацыянальную візу, за якую спаганяецца збор за падачу заявы ў памеры 60 еўра. З гэтага часу плата спаганяцца не будзе".

Гэтая льгота будзе давацца ў тых выпадках, калі МЗС Літвы пацвердзіць, што запыт быў пададзены з-за асаблівых гуманітарных прычын, або выдача нацыянальнай візы без збірання консульскага збору адпавядае мэтам супрацоўніцтва ў галіне развіцця, знешняй палітыкі ці нацыянальнай бяспекі.

Захар Шчарбакоў, БелаПАН.

Аўтарызацыя

Імя:
Пароль:

Архіў

  • дзень
  • месяц
  • год

Сюжэты




© 2000 — 2021 БелаПАН. Усе правы абароненыя.
Уся інфармацыя, размешчаная на гэтым сайце, прызначана толькі для персанальнага выкарыстання і не падлягае далейшаму ўзнаўленню і/або распаўсюджванню ў любой форме інакш як з пісьмовага дазволу БелаПАН

.239