Беларуская інфармацыйная кампанія
Адрас старонкі: https://by.belapan.by/archive/2021/02/22/eu_1078677_587477/
Дата раздрукоўкі: 02.03.2021 17:20
22.02.2021 12:03 Палітыка, Беларусь — Еўрасаюз

Кіраўнік еўрапейскай дыпламатыі: Рэпрэсіі ў Беларусі нарастаюць, мы павінны абмеркаваць магчымы адказ ЕС

Мінск, 22 лютага. У Беларусі працягваюць узмацняцца рэпрэсіі супраць грамадзян, заявіў вярхоўны прадстаўнік Еўрасаюза па знешняй палітыцы і палітыцы бяспекі Жазэп Барэль 22 лютага перад пачаткам пасяджэння Савета міністраў замежных спраў краін ЕС у Бруселі (трансляцыя прыбыцця ўдзельнікаў вялася на сайце Савета ЕС).

"Узмацняюцца рэпрэсіі, працягваецца запалохванне людзей, грамадзянскай супольнасці, — сказаў Барэль. — Савет міністраў замежных спраў павінен узяць гэта пад увагу, каб абмеркаваць магчымы адказ ЕС".

У сваю чаргу кіраўнік МЗС Літвы Габрыэлюс Ландсбергіс адзначыў: "Я ўдзячны спадару Барэлю за тое, што ён дадаў беларускае пытанне ў сённяшні парадак дня. Я думаю, што вельмі важна за ўсімі падзеямі, якія адбываюцца ў свеце, не губляць з увагі тое, што адбываецца ў нашых найбліжэйшых суседзяў. Тэма правоў чалавека і каштоўнасцяў застанецца галоўнай".

16 лютага ў Беларусі прайшлі вобшукі ў офісах і кватэрах дзясяткаў праваабаронцаў, прафсаюзных актывістаў і незалежных журналістаў па ўсёй краіне. Так, вобшукі былі праведзеныя ў офісе БАЖ, у яе старшыні Андрэя Бастунца, яго намеснікаў Барыса Гарэцкага і Алега Агеева, юрыста Крысціны Рыхтэр, у офісе цэнтра "Вясна" і ў яго старшыні Алеся Бяляцкага, у каардынатара кампаніі "Праваабаронцы супраць смяротнага пакарання" Андрэя Палуды, лідараў і актывістаў незалежнага прафсаюза РЭП, рэгіянальных праваабаронцаў у многіх гарадах.

Паводле інфармацыі МУС, праведзена прыкладна 90 вобшукаў. Следчы камітэт паведаміў, што вобшукі прайшлі ў межах расследавання справы паводле арт. 342 Крымінальнага кодэкса Беларусі (арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх).

Вобшукі і затрыманні асудзілі ў Савеце Еўропы, Еўрасаюзе, АБСЕ, арганізацыі "Міжнародная амністыя", беларускія праваабарончыя арганізацыі, Беларуская нацыянальная платформа Форуму грамадзянскай супольнасці Усходняга партнёрства і іншыя арганізацыі.

18 лютага суддзя Наталля Бугук на пасяджэнні суда Фрунзенскага раёна Мінска прыгаварыла карэспандэнтаў тэлеканала "Белсат" Кацярыну Андрэеву (Бахвалаву) і Дар`ю Чульцову да двух гадоў пазбаўлення волі ў калоніі агульнага рэжыму. Менавіта такое пакаранне запрасіла пракурор Аліна Кас`янчык. Журналісткі прызнаныя вінаватымі паводле ч. 1 арт. 342 Крымінальнага кодэкса (арганізацыя групавых дзеянняў, якія груба парушаюць парадак і спалучаныя з відавочным непадпарадкаваннем патрабаванням прадстаўнікоў улады, што пацягнула парушэнне працы транспарту, актыўны ўдзел у такіх дзеяннях). Андрэева і Чульцова віны не прызналі.

У абарону Андрэевай і Чульцовай выступіла беларуская і сусветная медыясупольнасць, Еўрасаюз, АБСЕ і іншыя міжнародныя арганізацыі. Праваабаронцы прызналі журналістак палітзняволенымі.

Таццяна Каравянкова, БелаПАН.

Аўтарызацыя

Імя:
Пароль:

Архіў

  • дзень
  • месяц
  • год

Сюжэты




© 2000 — 2021 БелаПАН. Усе правы абароненыя.
Уся інфармацыя, размешчаная на гэтым сайце, прызначана толькі для персанальнага выкарыстання і не падлягае далейшаму ўзнаўленню і/або распаўсюджванню ў любой форме інакш як з пісьмовага дазволу БелаПАН

.239