Беларуская інфармацыйная кампанія
Адрас старонкі: https://by.belapan.by/archive/2021/04/02/ru_1083220_1083225/
Дата раздрукоўкі: 19.04.2021 08:40
02.04.2021 17:51 Палітыка, Спорт

Следчы камітэт распачаў крымінальную справу ў дачыненні да Аляксандры Герасімені

Мінск, 2 красавіка. Следчы камітэт паведаміў аб распачынанні крымінальнай справы ў дачыненні да вядомай плыўчыхі, кіраўніка Беларускага фонду спартыўнай салідарнасці Аляксандры Герасімені і выканаўчага дырэктара фонду, заснавальніка гандбольнага клуба "Віцязь" Аляксандра Апейкіна.

"Паводле дадзеных следства, вышэйназваныя асобы ў жніўні 2020 года стварылі так званае аб`яднанне "Беларускі фонд спартыўнай салідарнасці", абвясціўшы яго мэтамі аказанне фінансавай і юрыдычнай дапамогі спартсменам, прыцягнутым да адказнасці за парушэнне заканадаўства Рэспублікі Беларусь. На справе Герасіменя і Апейкін, з`яўляючыся адпаведна старшынёй і выканаўчым дырэктарам, распаўсюджвалі заведама лжывыя звесткі аб ходзе і выніках выбарчай кампаніі, пра падзеі ў сацыяльнай, эканамічнай, палітычнай і культурнай сферах жыцця грамадства", — гаворыцца ў паведамленні СК.

"У інтэрнэце і сродках масавай інфармацыі звярталіся з заклікамі да замежных дзяржаў і міжнародных арганізацый аб учыненні дзеянняў, накіраваных на прычыненне шкоды нацыянальнай бяспецы Рэспублікі Беларусь", — сцвярджаецца ў рэлізе.

"У прыватнасці, — прыводзіць прыклад СК, — пад націскам членаў вышэйназванага "аб`яднання" з Беларусі перанесены шэраг буйных спартыўных мерапрыемстваў (верагодна, гаворка пра чэмпіянат свету па хакеі. БелаПАН.). У выніку дзеянняў Герасімені і Апейкіна, а таксама іншых асоб нанесены значны іміджавы і фінансавы ўрон, падарваны прэстыж краіны на міжнароднай і палітычнай арэне, дыскрэдытавана кіраўніцтва спартыўнай галіны і дзяржавы".

"Дзеянні членаў так званага БФСС следчымі кваліфікаваныя паводле ч. 3 арт. 361 (заклікі да ўчынення іншых дзеянняў, накіраваных на прычыненне шкоды нацыянальнай бяспецы Рэспублікі Беларусь, учыненыя з выкарыстаннем сродкаў масавай інфармацыі або глабальнай камп`ютарнай сеткі інтэрнэт) Крымінальнага кодэкса Рэспублікі Беларусь. Санкцыя артыкула прадугледжвае максімальнае пакаранне ў выглядзе пазбаўлення волі да 5 гадоў", — гаворыцца ў паведамленні.

Па крымінальнай справе "праводзяцца неадкладныя следчыя і працэсуальныя дзеянні".

Герасiменя i Апейкiн знаходзяцца па-за межамi Беларусi.

БелаПАН.

Аўтарызацыя

Імя:
Пароль:

Архіў

  • дзень
  • месяц
  • год

Сюжэты




© 2000 — 2021 БелаПАН. Усе правы абароненыя.
Уся інфармацыя, размешчаная на гэтым сайце, прызначана толькі для персанальнага выкарыстання і не падлягае далейшаму ўзнаўленню і/або распаўсюджванню ў любой форме інакш як з пісьмовага дазволу БелаПАН

.239